కడప అమీన్ పీర్ దర్గా ఉర్సు ఉత్సవాలకు సీఎం చంద్రబాబుకు ఆహ్వానం: పీఠాధిపతి అరీఫుల్లా హుస్సేనీ ప్రత్యేక భేటీ!
సూర్య అమరావతి బ్యూరో: సర్వమత సామరస్యానికి ప్రతీకగా నిలిచే చారిత్రక కడప పెద్ద దర్గా (శ్రీ అమీన్ పీర్ దర్గా) వార్షిక ఉర్సు మహోత్సవాలకు ముఖ్య అతిథిగా విచ్చేయాల్సిందిగా ముఖ్యమంత్రి నారా చంద్రబాబు నాయుడికి ఆహ్వానం అందింది. అమరావతిలోని సీఎం క్యాంప్ కార్యాలయంలో అమీన్ పీర్ దర్గా పీఠాధిపతి హజ్రత్ ఖ్వాజా సయ్యద్ షా ఆరీఫుల్లా హుస్సేనీ ముఖ్యమంత్రిని మర్యాదపూర్వకంగా కలిసి ఉర్సు ఉత్సవాల ఆహ్వాన పత్రికను అందజేశారు.
ఈ సందర్భంగా పీఠాధిపతి ముఖ్యమంత్రికి ప్రత్యేక దుశ్శాలువా కప్పి, దర్గా పవిత్ర తబరుక్ (ప్రసాదం) అందజేసి ప్రత్యేక ప్రార్థనలు (దువా) నిర్వహించారు. రాష్ట్ర ప్రజలందరూ సుఖసంతోషాలతో, ఆయురారోగ్యాలతో వర్ధిల్లాలని ఆకాంక్షించారు. కడప పెద్ద దర్గాలో అత్యంత వైభవంగా జరగనున్న గంధం మహోత్సవం, ఉర్సు వేడుకల తేదీలు మరియు విశిష్టతను సీఎంకు వివరించారు. దేశం నలుమూలల నుంచే కాకుండా ప్రముఖ సినీ, రాజకీయ ప్రముఖులు, లక్షలాది మంది భక్తులు తరలివచ్చే ఈ వేడుకలకు సంబంధించి దర్గా కమిటీ చేపడుతున్న ఏర్పాట్లను తెలియజేశారు.
ఆహ్వానాన్ని స్వీకరించిన ముఖ్యమంత్రి చంద్రబాబు నాయుడు.. దర్గా పెద్దలకు కృతజ్ఞతలు తెలుపుతూ, ఉర్సు ఉత్సవాలకు వచ్చే భక్తులకు ఎలాంటి అసౌకర్యాలు కలగకుండా ప్రభుత్వం తరఫున పకడ్బందీ ఏర్పాట్లు చేయాలని సంబంధిత అధికారులను ఆదేశిస్తామని హామీ ఇచ్చారు. ఉర్సు ఉత్సవాలకు హాజరయ్యే అంశంపై ముఖ్యమంత్రి సానుకూలంగా స్పందించినట్లు దర్గా వర్గాలు పేర్కొన్నాయి.
