దేశవ్యాప్తంగా 490 మంది పోలీసు సిబ్బందికి 'కేంద్రీయ గృహమంత్రి దక్షతా పదక్-2026' ప్రకటన

సూర్య జాతీయ డెస్క్: దేశంలోని వివిధ రాష్ట్రాలు, కేంద్రపాలిత ప్రాంతాలతో పాటు కేంద్ర సాయుధ పోలీసు బలగాలకు చెందిన అత్యుత్తమ ప్రతిభ కనబరిచిన సిబ్బందికి కేంద్ర ప్రభుత్వం ప్రఖ్యాత పురస్కారాలను ప్రకటించింది. దేశ భద్రత, శాంతిభద్రతల పరిరక్షణలో కీలక పాత్ర పోషిస్తున్న వివిధ పోలీసు మరియు భద్రతా సంస్థల అధికారులకు 'కేంద్రీయ గృహమంత్రి దక్షతా పదక్-2026' అవార్డులను ప్రదానం చేస్తున్నట్లు కేంద్ర హోంశాఖ అధికారికంగా వెల్లడించింది. దేశం కోసం ప్రాణాలను సైతం లెక్కచేయకుండా విధులు నిర్వర్తించే సిబ్బందిలో వృత్తిగత ప్రమాదాలను అధిగమించే ధైర్యాన్ని నింపడానికి, వారి సేవలను జాతీయ స్థాయిలో గౌరవించడానికి ఈ పురస్కారాలు ఎంతగానో దోహదపడతాయని ప్రభుత్వం స్పష్టం చేసింది.

సంచలనాత్మక కేసులు, ఉగ్రవాద నిరోధక చర్యలు మరియు అత్యుత్తమ దర్యాప్తు ప్రతిభను గుర్తించి ఈ ఏడాది మొత్తం 490 మందిని ఈ పురస్కారానికి ఎంపిక చేశారు. ఇందులో ప్రత్యేక ఆపరేషన్లలో అసాధారణ ధైర్యసాహసాలు ప్రదర్శించిన 358 మందికి, అత్యున్నత దర్యాప్తు ప్రమాణాలు పాటించి కేసులను ఛేదించిన 123 మందికి, అలాగే ఫోరెన్సిక్ సైన్స్ రంగంలో విశేష సేవలందించిన తొమ్మిది మంది నిపుణులకు ఈ పతకాలు దక్కాయి. ప్రధానమంత్రి నరేంద్ర మోదీ ఆలోచనల మేరకు, కేంద్ర హోంమంత్రి అమిత్ షా ప్రత్యేక మార్గదర్శకత్వంలో 2024 ఫిబ్రవరి 1వ తేదీన ఈ పతకాన్ని ప్రత్యేకంగా ఏర్పాటు చేసినట్లు హోంశాఖ తన ప్రకటనలో పేర్కొంది.

దేశ ప్రథమ ఉప ప్రధాని మరియు ఉక్కు మనిషి సర్దార్ వల్లభ్‌భాయ్ పటేల్ జయంతి అయిన అక్టోబర్ 31వ తేదీని పురస్కరించుకుని ప్రతి ఏటా ఈ అవార్డులను ప్రకటిస్తుంటారు. ఈసారి ప్రకటించిన జాబితాలో సీఆర్పీఎఫ్, వివిధ రాష్ట్రాల పోలీసు విభాగాలతో పాటు ఇంటెలిజెన్స్, సెంట్రల్ బోర్డ్ ఆఫ్ ఇన్ డైరెక్ట్ ట్యాక్సెస్ అండ్ కస్టమ్స్ వంటి పలు సంస్థలకు చెందిన అధికారులు ఉన్నారు. పోలీస్ శాఖలో అత్యున్నత వృత్తిపరమైన ప్రమాదాలను ఎదుర్కొంటూ నిబద్ధతతో పనిచేసే సిబ్బందికి ఈ అవార్డులు అత్యున్నత నైతిక స్థైర్యాన్ని ఇస్తాయని దేశవ్యాప్తంగా ఉన్న పోలీసు వర్గాలు అభిప్రాయపడుతున్నాయి. అవార్డు గ్రహీతల పూర్తి వివరాలతో కూడిన జాబితాను కేంద్ర హోంశాఖ అధికారిక వెబ్‌సైట్‌లో అందుబాటులో ఉంచినట్లు అధికారులు తెలిపారు.