దేశంలో ఒక బిలియన్ మందికిపైగా సామాజిక భద్రత
సూర్య జాతీయ డెస్క్: భారతదేశంలో అత్యధిక జనాభాకు ఆర్థిక, సామాజిక భద్రత కల్పించే లక్ష్యంతో కేంద్ర ప్రభుత్వం అత్యంత ప్రతిష్టాత్మక సంస్కరణలను అమలు చేస్తోంది. దేశవ్యాప్తంగా వంద కోట్లకు పైగా (వన్ బిలియన్) ప్రజలను వివిధ సామాజిక భద్రతా పథకాల పరిధిలోకి తీసుకువస్తూ విప్లవాత్మక అడుగులు వేసింది. అసంఘటిత రంగ కార్మికులు, పేదలు, మహిళలు మరియు వయోవృద్ధుల సంక్షేమానికి ప్రాధాన్యతనిస్తూ అమలు చేస్తున్న ఈ సంస్కరణలు భారతదేశంలో పేదరిక నిర్మూలనకు మరియు సామాజిక సమానత్వానికి కొత్త ఊపిరి పోస్తున్నాయని విశ్లేషకులు స్పష్టం చేస్తున్నారు.
కేంద్ర ప్రభుత్వం చేపట్టిన సాంకేతిక సంస్కరణలు ఈ పథకాల విజయవంతమైన అమలులో కీలక పాత్ర పోషిస్తున్నాయి. ఈ-శ్రమ్ పోర్టల్ ద్వారా కోట్లాది మంది అసంఘటిత రంగ కార్మికులను ఒకే వేదికపైకి తీసుకురావడం విశేషం. దీని ద్వారా ప్రమాద భీమా, పింఛన్ పథకాలు మరియు అత్యవసర సమయాల్లో నేరుగా ఆర్థిక సహాయం పొందే సౌలభ్యం లభించింది. అదేవిధంగా ప్రధానమంత్రి శ్రమ్ యోగి మాన్-ధన్, అటల్ పెన్షన్ యోజన మరియు ప్రధానమంత్రి జీవన్ జ్యోతి భీమా యోజన వంటి పథకాలు సామాన్య పౌరులకు కొండంత అండగా నిలుస్తున్నాయి.
ఆరోగ్య భద్రత రంగంలో ఆయుష్మాన్ భారత్ డిజిటల్ మిషన్ ప్రపంచంలోనే అతిపెద్ద ఉచిత ఆరోగ్య భద్రతా కార్యక్రమంగా రికార్డు సృష్టించింది. పేద కుటుంబాలకు ఉచిత వైద్య చికిత్స అందిస్తూ ఆర్థికంగా కోలుకోలేని దెబ్బతినకుండా కాపాడుతోంది. ప్రత్యక్ష నగదు బదిలీ వ్యవస్థ ద్వారా మధ్యవర్తుల ప్రమేయం లేకుండా అర్హులైన లబ్ధిదారుల బ్యాంక్ ఖాతాల్లోకే నిధులు నేరుగా చేరుతుండటంతో అవినీతికి అడ్డుకట్ట పడింది. భారత ప్రభుత్వ సంక్షేమ నమూనా మరియు ఈ బృహత్తర సంస్కరణలు ఇతర అభివృద్ధి చెందుతున్న దేశాలకు మార్గదర్శకంగా నిలుస్తున్నాయని అంతర్జాతీయ సంస్థలు సైతం ప్రశంసిస్తున్నాయి.
