అసోం పాడి, అగర్‌వుడ్ రైతులకు భారీ ఊరట
సూర్య జాతీయ డెస్క్: ఈశాన్య రాష్ట్రాల రైతులు మరియు స్థానిక వ్యాపారుల చిరకాల స్వప్నం నెరవేరింది. అసోం ప్రాంతంలో అత్యంత విలువైన అగర్‌వుడ్ చిప్స్ మరియు అగర్‌వుడ్ నూనెను విదేశాలకు ఎగుమతి చేసేందుకు మార్గం సుగమమైంది. గౌహతిలోని లోక్రియ ప్రియ గోపినాథ్ బోర్డోలోయ్ అంతర్జాతీయ విమానాశ్రయాన్ని అధికారిక ఎగుమతి కేంద్రంగా గుర్తిస్తూ కేంద్ర ప్రభుత్వం కీలక నిర్ణయం తీసుకున్నట్లు కేంద్ర వాణిజ్య మరియు పరిశ్రమల శాఖ మంత్రి పీయూష్ గోయల్ ప్రకటించారు. ఈ చారిత్రాత్మక నిర్ణయంతో ఈశాన్య ప్రాంతంలోని అగర్‌వుడ్ ఆధారిత రైతులు, ఉత్పాదకులు మరియు చిన్న స్థాయి వ్యాపారుల ఆర్థిక పరిస్థితి మెరుగుపడటంతో పాటు అంతర్జాతీయ మార్కెట్లోకి నేరుగా ఉత్పత్తులను పంపేందుకు అద్భుతమైన అవకాశం లభించిందని నిపుణులు పేర్కొంటున్నారు.
అసోంలోని వివిధ జిల్లాల్లో అగర్‌వుడ్ చెట్ల సాగు మరియు వాటి ద్వారా సుగంధ ద్రవ్యాలు, నూనెలను తయారు చేయడం శతాబ్దాలుగా వస్తున్న సాంప్రదాయ కుటీర పరిశ్రమగా కొనసాగుతోంది. అయితే ఇప్పటివరకు సరైన విమానాశ్రయ ఎగుమతి సౌకర్యాలు లేకపోవడం వల్ల ఇక్కడి రైతులు ఇతర రాష్ట్రాల మీదుగా సరుకును రవాణా చేయాల్సి వచ్చేది. దీనివల్ల రవాణా ఖర్చులు విపరీతంగా పెరగడమే కాకుండా సమయం కూడా వృథా అయ్యేది. ఈ సమస్యను పూర్తిగా పరిష్కరిస్తూ గౌహతి ఎయిర్‌పోర్టును ఎగుమతి హబ్‌గా మలచడంతో ఇకపై స్థానిక రైతులు నేరుగా ప్రపంచ దేశాలకు తమ ఉత్పత్తులను ఎగుమతి చేసుకునే ససులుబాటు కల్గింది.
ప్రపంచవ్యాప్తంగా అగర్‌వుడ్ నూనె మరియు సుగంధ ఉత్పత్తులకు మిడిల్ ఈస్ట్ అలాగే ఇతర దేశాలలో అత్యంత డిమాండ్ ఉంది. ఈ నిర్ణయం ద్వారా అసోం అగర్‌వుడ్ ఉత్పత్తులు గ్లోబల్ మార్కెట్‌లో సరికొత్త రికార్డులను సృష్టించే అవకాశం ఉందని వాణిజ్య వర్గాలు అంచనా వేస్తున్నాయి. పీఎం మోదీ నేతృత్వంలోని ప్రభుత్వం ఈశాన్య రాష్ట్రాల ఆర్థికాభివృద్ధికి, స్వయం ఉపాధి రంగాలకు అత్యంత ప్రాధాన్యతనిస్తోందని ఈ నిర్ణయం మరోసారి నిరూపించిందని స్థానిక ప్రజాప్రతినిధులు హర్షం వ్యక్తం చేశారు. ప్రభుత్వ ప్రకటనతో అసోంలోని వేలాది మంది అగర్‌వుడ్ సాగుదారులు, తయారీదారులలో నూతనోత్సాహం వెల్లువెత్తుతోంది.
