మైక్రోసాఫ్ట్ ఔటేజ్: ఔట్‌లుక్, మైక్రోసాఫ్ట్ 365 సేవల్లో అంతరాయం.. ప్రభావితమైన సేవల జాబితా
సూర్య గ్లోబల్ & టెక్ డెస్క్: టెక్ దిగ్గజం మైక్రోసాఫ్ట్ సేవల్లో ప్రపంచవ్యాప్తంగా భారీ సాంకేతిక అంతరాయం ఏర్పడింది. గురువారం రాత్రి నుంచి శుక్రవారం ఉదయం వరకు మైక్రోసాఫ్ట్ 365, ఔట్‌లుక్ సహా పలు కీలక క్లౌడ్ సేవలు నిలిచిపోవడంతో లక్షలాది మంది కార్పొరేట్ ఉద్యోగులు, సాధారణ వినియోగదారులు తీవ్ర ఇబ్బందులు ఎదుర్కొన్నారు. ప్రముఖ ఔటేజ్ ట్రాకింగ్ వెబ్‌సైట్ 'డౌన్‌డిటెక్టర్'ప్రకారం, ఒక్క ఔట్‌లుక్ సేవలపైనే గరిష్టంగా 1.30 లక్షలకు పైగా ఫిర్యాదులు నమోదయ్యాయి.
ప్రభావితమైన మైక్రోసాఫ్ట్ సేవల పూర్తి జాబితా:
మైక్రోసాఫ్ట్ ఔట్‌లుక్ & ఎక్స్ఛేంజ్ ఆన్‌లైన్ : ఇమెయిల్స్ పంపడం, స్వీకరించడం మరియు ఇన్‌బాక్స్ లోడ్ అవ్వడంలో తీవ్ర అంతరాయం ఏర్పడింది.
మైక్రోసాఫ్ట్ 365 సూట్ : వర్డ్ , ఎక్సెల్ ), పవర్‌పాయింట్ వంటి ఆన్‌లైన్ అప్లికేషన్ల యాక్సెస్ నిలిచిపోయింది.
మైక్రోసాఫ్ట్ టీమ్స్: ఆఫీస్ మీటింగ్‌లు, మెసేజింగ్ సేవల్లో సమస్యలు తలెత్తాయి.
మైక్రోసాఫ్ట్ కోపైలట్ ఏఐ : మైక్రోసాఫ్ట్ ఏఐ అసిస్టెంట్ సేవలు కూడా మొరాయించాయి.
షేర్‌పాయింట్ ఆన్‌లైన్ & అడ్మిన్ సెంటర్ : క్లౌడ్ ఫైల్ షేరింగ్ మరియు ఐటీ అడ్మినిస్ట్రేటర్ల పోర్టల్ సేవలకు ఆటంకం కలిగింది.
మైక్రోసాఫ్ట్ డిఫెండర్ ఎక్స్‌డీఆర్ & అజూర్ : సెక్యూరిటీ మరియు క్లౌడ్ ఇన్‌ఫ్రాస్ట్రక్చర్ సేవలపై ప్రభావం పడింది.
అసలు కారణమేంటి? మైక్రోసాఫ్ట్ ఏం చెప్పింది?
ఈ సాంకేతిక లోపంపై మైక్రోసాఫ్ట్ 365 స్టేటస్ ఎక్స్ వేదికగా స్పందించింది. పలు సర్వర్లు అనుకోకుండా పనిచేయడం మానేయడం మరియు ఆటోమేటెడ్ హెల్త్ చెక్స్ విఫలం కావడం వల్ల మిగిలిన మౌలిక సదుపాయాలపై ఒక్కసారిగా అధిక భారం పడిందని సంస్థ వివరించింది.
ప్రస్తుతం ట్రాఫిక్‌ను ప్రత్యామ్నాయ మార్గాల్లోకి మళ్లించామని, ప్రభావితమైన సర్వర్లను రీస్టార్ట్ చేస్తూ దశలవారీగా సేవలను పునరుద్ధరిస్తున్నామని మైక్రోసాఫ్ట్ వెల్లడించింది. వినియోగదారులకు క్రమంగా సేవలు అందుబాటులోకి వస్తున్నాయని సంస్థ భరోసా ఇచ్చింది.
