అమెరికా కంపెనీలకు ట్రంప్ సర్కార్ హెచ్చరిక
సూర్య అంతర్జాతీయ డెస్క్: అమెరికా టెక్నాలజీ భద్రతను మరింత కఠినతరం చేసే దిశగా డొనాల్డ్ ట్రంప్ యంత్రాంగం మరో కీలక చర్యకు సిద్ధమవుతోంది. అమెరికన్ కంపెనీలు తమ వ్యాపార కార్యకలాపాలలో చైనాకు చెందిన కృత్రిమ మేధస్సు (AI) మోడల్స్ను ఉపయోగిస్తే, ఆ వివరాలను బహిరంగంగా వెల్లడించేలా నిబంధనలను తీసుకురావాలని యోచిస్తోంది. వైట్హౌస్ మరియు యూఎస్ ట్రెజరీ డిపార్ట్మెంట్ సంయుక్తంగా ఈ ప్రతిపాదనపై చర్చిస్తున్నట్లు సమాచారం.
తక్కువ ఖర్చుతో మెరుగైన పనితీరును కనబరుస్తున్న చైనా ఓపెన్-వెయిట్ ఏఐ మోడల్స్ను (ఉదాహరణకు అలీబాబా క్యూవెన్ వంటివి) కొన్ని అమెరికన్ సంస్థలు కస్టమర్ సర్వీస్ తదితర అవసరాల కోసం వాడుతున్నట్లు గుర్తించారు. అయితే, చైనా టెక్నాలజీపై అమెరికన్ కంపెనీల ఆధారపడటాన్ని తగ్గించడంతో పాటు, జాతీయ భద్రతకు ముప్పు వాటిల్లకుండా పారదర్శకతను పాటించాలన్నదే ఈ కొత్త నిబంధన ముఖ్య ఉద్దేశంగా తెలుస్తోంది.
కంపెనీలు తమ కార్పొరేట్ వెబ్సైట్లలో తాము వాడే చైనా ఏఐ మోడల్స్ వివరాలను తప్పనిసరిగా డిస్క్లోజ్ చేయాలనే 'నేమ్ అండ్ షేమ్' తరహా విధానాన్ని పరిశీలిస్తున్నట్లు నివేదికలు వెల్లడిస్తున్నాయి. మరోవైపు, విదేశీ డేటా సెంటర్ల ద్వారా అమెరికన్ ఏఐ సాంకేతికతను చైనా పరోక్షంగా దక్కించుకోకుండా నిరోధించేందుకు ప్రభుత్వం ఇప్పటికే కఠినమైన ఆంక్షలకు తెరతీసింది. టెక్ రంగంలో అమెరికా-చైనా మధ్య మారుతున్న పరిణామాల నేపథ్యంలో ఈ తాజా నిబంధనల ప్రతిపాదన వ్యాపార వర్గాల్లో తీవ్ర చర్చనీయాంశంగా మారింది.