విజయ్ బయోపిక్లో హీరోగా జేసన్ సంజయ్.. దర్శకుడు ఎవరంటే?
సూర్య ఎంటర్టైన్మెంట్ డెస్క్: దశాబ్దాల పాటు సినీ రంగంలో తనదైన ముద్ర వేసిన విజయ్, కెరీర్ అత్యున్నత దశలో ఉండగానే రాజకీయ రంగంలోకి అడుగుపెట్టిన విషయం తెలిసిందే. ప్రజాక్షేత్రంలో ముఖ్యమంత్రిగా బాధ్యతలు చేపట్టిన అనంతరం ఆయన సినిమాలకు దూరమయ్యారు. దీంతో విజయ్ను వెండితెరపై చూడలేకపోతున్నామనే లోటు అభిమానుల్లో నెలకొంది. ఈ నేపథ్యంలో విజయ్ జీవిత కథ ఆధారంగా బయోపిక్ తెరకెక్కనుందన్న వార్త కోలీవుడ్ వర్గాల్లో ఆసక్తి రేపుతోంది.
ఈ బయోపిక్లో విజయ్ పాత్రను ఆయన తనయుడు జేసన్ సంజయ్ పోషించనున్నట్లు సినీ వర్గాల్లో జోరుగా ప్రచారం సాగుతోంది. ఇప్పటికే దర్శకుడిగా సినీ ప్రయాణం ప్రారంభించిన జేసన్ సంజయ్, రూపురేఖలు, హావభావాల పరంగా తండ్రికి తగ్గ వారసుడిగా కనిపిస్తారని అభిమానులు అభిప్రాయపడుతున్నారు. ఈ ప్రాజెక్ట్ కార్యరూపం దాల్చితే జేసన్ సంజయ్ పూర్తిస్థాయి హీరోగా ప్రేక్షకుల ముందుకు వచ్చే అవకాశం ఉందని ఇండస్ట్రీలో చర్చ జరుగుతోంది.
మరోవైపు ఈ బయోపిక్కు దర్శకుడిగా రాజ్కుమార్ పెరియసామి పేరు వినిపిస్తోంది. దీనిపై అధికారికంగా ఎలాంటి ప్రకటన రానప్పటికీ, ఇటీవల ఓ సినిమా ప్రమోషన్ సందర్భంగా సాయి పల్లవి చేసిన వ్యాఖ్యలు ఈ ఊహాగానాలకు బలాన్ని చేకూర్చాయి. విజయ్ చివరి చిత్రం జననాయగన్ ప్రమోషన్లలో భాగంగా వచ్చిన వన్ లాస్ట్ డ్యాన్స్ వీడియో చూసి రాజ్కుమార్ పెరియసామి భావోద్వేగానికి గురయ్యారని ఆమె తెలిపారు. విజయ్పై ఉన్న అభిమానం, గౌరవం దృష్ట్యా ఈ బయోపిక్కు ఆయన దర్శకత్వం వహిస్తే బాగుంటుందనే అభిప్రాయం సినీ వర్గాల్లో వ్యక్తమవుతోంది. అధికారిక ప్రకటన కోసం అభిమానులు ఆసక్తిగా ఎదురుచూస్తున్నారు.
Also Read: పిల్లలను పెంచలేని పరిస్థితుల్లో ఉన్న తల్లిదండ్రులు శిశుగృహానికి అప్పగించాలి