బలిజేపల్లిలో కన్నుల పండువగా ధ్వజస్తంభ పునఃప్రతిష్ఠ మహోత్సవం --శివనామస్మరణతో మార్మోగిన మల్లేశ్వర స్వామి దేవస్థానం
వేమూరు(భట్టిప్రోలు) మేజర్ న్యూస్: వేమూరు మండలంలోని బలిజేపల్లి గ్రామంలో వేంచేసియున్న శ్రీ గంగా పార్వతీ సమేత మల్లేశ్వర స్వామి దేవస్థానంలో సోమవారం ధ్వజారోహణ, ధ్వజస్తంభ పునర్నిర్మాణ, పునఃప్రతిష్ఠ కార్యక్రమం ఎంతో కన్నుల పండుగగా, భక్తి శ్రద్ధలతో ఘనంగా జరిగింది.
సోమవారం ఉదయం గం 9-45 లకు అర్చకులు వేదమంత్రాలతో, మంగళ వాయిద్యాల నడుమ నూతన ధ్వజస్తంభాన్ని పునఃప్రతిష్ఠ చేశారు. ఆ సమయంలో ఆలయ ప్రాంగణం మొత్తం "హర హర మహాదేవ, ఓం నమః శివాయ" నామస్మరణతో మార్మోగిపోయింది. భక్తులు భక్తితో ధ్వజస్తంభానికి పసుపు, కుంకుమలు సమర్పించి మొక్కులు తీర్చుకున్నారు.
*క్రేన్ సాయంతో ధ్వజస్తంభ ప్రతిష్ఠ*
భారీ ధ్వజస్తంభాన్ని క్రేన్ సాయంతో జాగ్రత్తగా నిలబెట్టిన దృశ్యం భక్తులను ఎంతో ఆకట్టుకుంది. ఆలయ గోపురం ముందు పూలతో అలంకరించిన బంగారు వర్ణ ధ్వజస్తంభం ఆకాశాన్ని తాకుతూ దర్శనమిచ్చింది. అరటి చెట్లు, మామిడి తోరణాలతో ఆలయాన్ని అందంగా అలంకరించారు. గజ స్తంభ ప్రతిష్టా కార్యక్రమానికి మండల పరిధిలోనే కాక ఇతర గ్రామాల ప్రజలు భక్తులు అధిక సంఖ్యలో పాల్గొన్నారు.