andhrapradesh
అండమాన్ సాంస్కృతిక వేదికపై మెరిసిన దివిసీమ చిన్నారి శివతాండవ నృత్యంతో సరయుకు రజత పతకం
అవనిగడ్డ, మేజర్ న్యూస్: వయసు చిన్నదైనా.. ప్రతిభలో మాత్రం జాతీయ స్థాయిలో సత్తా చాటింది దివిసీమ చిన్నారి మలిశెట్టి సరయు. అండమాన్ నికోబార్ దీవుల్లో నిర్వహించిన 16వ కల్చరల్ ఒలంపియాడ్ ఆఫ్ పెర్ఫార్మింగ్ ఆర్ట్స్-2026 పోటీల్లో శివతాండవ నృత్య ప్రదర్శనతో ద్వితీయ స్థానం సాధించి రజత పతకాన్ని కైవసం చేసుకుంది.
గ్లోబల్ కౌన్సిల్ ఆఫ్ ఆర్ట్ అండ్ కల్చర్, అఖిల భారతీయ సాంస్కృతిక సంఘ్ ఆధ్వర్యంలో ఈ నెల 12 నుంచి 16వ తేదీ వరకు జరిగిన ఈ పోటీల్లో సెమీ క్లాసికల్ సోలో డాన్స్ జూనియర్ రెపర్టరీ విభాగంలో సరయు పలువురు చిన్నారులతో పోటీపడి ప్రతిభ కనబరిచింది. యునెస్కో అధికారిక భాగస్వామ్యంతో నిర్వహించిన ఈ పోటీల్లో రజత పతకం సాధించడం విశేషం.
దివిసీమ నాగాయలంక కు చెందిన సీనియర్ ఫొటోగ్రాఫర్, జర్నలిస్ట్ సింహాద్రి కృష్ణప్రసాద్ మనవరాలైన సరయు.. విజేత, మలిశెట్టి వాసు దంపతుల కుమార్తె. తల్లిదండ్రులు హైదరాబాద్లోని ప్రగతినగర్లో నివాసం ఉంటున్నారు. అక్కడ నృత్త నాట్యాలయం డాన్స్ అకాడమీ అధినేత్రి, గురువు కంబాల చైతన్య వద్ద సరయు నృత్య శిక్షణ పొందుతోంది. 2025లో హైదరాబాద్ రవీంద్రభారతిలో నృత్య రంగ ప్రవేశం చేసింది.
ఈ ఏడాది మే, జూన్ నెలల్లో పుణెలో జరిగిన నేషనల్ ఆర్ట్ అండ్ టాలెంట్ సెర్చ్ కార్నివాల్లో మూడు సీజన్ల టాక్పోటీల్లో పాల్గొని జాతీయ స్థాయిలో ద్వితీయ స్థానం సాధించింది. దీంతో అండమాన్లో జరిగిన 16వ కల్చరల్ ఒలంపియాడ్కు నేరుగా అర్హత పొందింది. పుణెలో అర్హత సాధించిన 480 మంది కళాకారులు అండమాన్లో నృత్యం, గాత్రం, వాయిద్యం, ఏకపాత్రాభినయం విభాగాల్లో పోటీపడ్డారు.
ఇదిలా ఉండగా, నృత్త నాట్యాలయం నుంచి పాల్గొన్న గీతిక, వాత్సల్య ఇతర విభాగాల్లో తృతీయ స్థానాలు సాధించినట్లు గురువు చైతన్య తెలిపారు. సరయు సాధించిన విజయానికి గురువు అందించిన శిక్షణ, చిన్నారి అంకితభావమే కారణమని తల్లిదండ్రులు విజేత, వాసు పేర్కొంటూ గురువుకు కృతజ్ఞతలు తెలిపారు.
✍️ అజంతా శ్రీనివాస్ అవనిగడ్డ కృష్ణాజిల్లా