పాలకుర్తిలో పొలం పిలుస్తుంది కార్యక్రమం
కోడుమూరు మేజర్ న్యూస్ : కోడుమూరు మండలంలోని పాలకుర్తి గ్రామంలో ఈరోజు పొలం పిలుస్తుంది కార్యక్రమాన్ని నిర్వహించారు. ఈ కార్యక్రమంలో వ్యవసాయ అధికారులు, శాస్త్రవేత్తలు గ్రామంలోని రైతులతో కలిసి పంట పొలాలను పరిశీలించి, పంటల సాగు విధానాలు, చీడపీడలు, తెగుళ్ల నివారణ చర్యలపై రైతులకు అవగాహన కల్పించారు.
ఈ కార్యక్రమంలో కర్నూలు ఏడీఏ (సహాయ వ్యవసాయ సంచాలకులు), కర్నూలు వ్యవసాయ మార్కెట్ యార్డులోని డాట్ సెంటర్ (ఏరువాక కేంద్రం) ప్రధాన శాస్త్రవేత్త డాక్టర్ సుజాతమ్మ, మండల వ్యవసాయ అధికారి, పాలకుర్తి రైతు సేవా కేంద్రం సిబ్బంది, గ్రామ రైతులు పాల్గొన్నారు.
ఈ సందర్భంగా రబీ సీజన్లో జాతీయ ఆహార నూనెగింజల పథకం (VCC) కింద రైతులకు ఉచితంగా అందించిన వేరుశనగ విత్తనాలతో సాగు చేసిన పంటను అధికారులు, శాస్త్రవేత్తలు పరిశీలించారు. పంటలో రసం పీల్చే పురుగు, మొవ్వ కుళ్ళు తెగులు గుర్తించిన నేపథ్యంలో వాటి నివారణకు ఎకరాకు 100 మి.లీ. కార్బెండజిమ్ 250 గ్రాములు పిచికారీ చేయాలని రైతులకు సూచించారు.
అదేవిధంగా వేరుశనగ పంట పూత దశలో ఉన్నప్పుడు ఎకరాకు 200 కిలోల చొప్పున జిప్సం చల్లుకోవాలని తెలిపారు. పోషకాల లోపాలను నివారించేందుకు నానో డీఏపీ లేదా 19:19:19 కాంప్లెక్స్ ఎరువును పిచికారీ చేయాలని సూచించారు.
రైతులు వ్యవసాయ అధికారుల సూచనలు పాటిస్తూ సరైన యాజమాన్య పద్ధతులు అవలంబించినట్లయితే అధిక దిగుబడులు సాధించవచ్చని అధికారులు వివరించారు.