పెళ్లి వార్తలపై నటి స్నిగ్ధ క్లారిటీ.. ఆ వీడియోపై నిజం బయటపెట్టిన నూతన నటి!

సూర్య ఎంటర్‌టైన్‌మెంట్ డెస్క్: అలా మొదలైంది చిత్రంతో టాలీవుడ్‌లోకి ఎంట్రీ ఇచ్చి, తనదైన ప్రత్యేకమైన నటనతో తెలుగు ప్రేక్షకులను అలరించిన నటి స్నిగ్ధ నయని తాజాగా తన పెళ్లి వార్తలపై స్పందించారు. సినిమాల్లో విభిన్న పాత్రలు పోషించడంతో పాటు గాయనిగానూ పలు షోలలో పాల్గొన్న ఆమె, ఇటీవల సోషల్ మీడియాలో వైరల్ అయిన తన వివాహ వీడియోపై వస్తున్న తప్పుడు ప్రచారానికి చెక్ పెట్టారు. ఒక మంచి సందేశం ఇచ్చే ఉద్దేశంతో సరదాగా చేసిన రీల్ వీడియోను చూసి, నిజంగానే తాను పెళ్లి చేసుకున్నట్లు దుష్ప్రచారం చేస్తున్నారని ఆమె కుండబద్దలు కొట్టారు.

తాజాగా ఇచ్చిన ఒక ఇంటర్వ్యూలో స్నిగ్ధ మాట్లాడుతూ, నేటి కాలంలో చిన్న చిన్న మనస్పర్థలకే జంటలు విడిపోతున్నారని, అలా మంచి ప్రేమను ఎవరూ కోల్పోకూడదనే ఉద్దేశంతోనే ఆ వీడియోను రూపొందించినట్లు స్పష్టం చేశారు. అయితే ఆ వీడియోలో తాను ఓ అమ్మాయిని పెళ్లి చేసుకున్నట్లు నటించడంతో, బంధువులు సైతం ఫోన్లు చేసి పెళ్లి ఎప్పుడు చేసుకున్నావంటూ ఆశ్చర్యంగా అడగడం జరిగిందని ఆమె తెలిపారు. సమాజానికి ఒక మంచి ఆలోచన పంచాలని చేసిన ఆ వీడియోను కొందరు కావాలనే వివాదాస్పదం చేసి వైరల్ చేశారని ఆమె ఆవేదన వ్యక్తం చేశారు.

ఇదే ఇంటర్వ్యూలో తనపై వస్తున్న ఇతర వ్యక్తిగత రూమర్స్ గురించి కూడా స్నిగ్ధ స్పష్టతనిచ్చారు. తనకు పీసీఓడీ సమస్య ఉందని, దాని వల్ల హార్మోన్ల అసమతుల్యత ఏర్పడి ముఖంపై అవాంచిత రోమాలు రావడం చాలా సహజమని ఆమె వివరించారు. చాలా మంది అమ్మాయిలు ఈ సమస్యను ఎదుర్కొంటారని, ఇది కేవలం ఆరోగ్యపరమైన విషయమేనని స్పష్టం చేశారు. ఇక భవిష్యత్తులో పెళ్లి గురించి మాట్లాడుతూ, తనకు తోడుగా ఉండే మంచి మనసున్న వ్యక్తి దొరికితే జెండర్‌తో సంబంధం లేకుండా ఎవరైనా సరే వివాహం చేసుకుంటానని, లేదంటే జీవితాంతం ఇలాగే సింగిల్‌గా ఉంటానని కుండబద్దలు కొట్టారు.

Also Read: జేడీ చక్రవర్తికి అంతర్జాతీయ గౌరవం.. 'దాహిణీ: ది విచ్' మూవీకి బెస్ట్ యాక్టర్ అవార్డ్ సొంతం!