వీధి కుక్కల సమస్య పరిష్కారానికి చర్యలు తీసుకోవాలి
అనంతపురం బ్యూరో మేజర్ న్యూస్ : 46వ డివిజన్ పరిధిలో వీధి కుక్కల సమస్యను పరిష్కరించి ప్రజలకు ఇబ్బందులు లేకుండా తగిన చర్యలు తీసుకోవాలని సంబంధిత మున్సిపల్ అధికారులను డివిజన్ కార్పొరేటర్ ఖాజా వలి షేక్ కోరారు.
ఈ సందర్భంగా ఆయన మాట్లాడుతూ.. డివిజన్ పరిధిలోని కోవూరు నగర్లో ఈరోజు ఉదయం నుంచే మున్సిపల్ అధికారులు, పారిశుద్ధ్య కార్మికులతో కలిసి ప్రత్యేక పరిశుభ్రత కార్యక్రమాలు నిర్వహించినట్లు తెలిపారు. ప్రజలకు ఆహ్లాదకరమైన, ఆరోగ్యకరమైన వాతావరణం కల్పించడమే లక్ష్యంగా నిరంతరం కృషి చేస్తున్నామని పేర్కొన్నారు.
అయితే, డివిజన్లో వీధి కుక్కల సమస్య ఇంకా పూర్తిస్థాయిలో పరిష్కారం కాలేదని ఆవేదన వ్యక్తం చేశారు. రాత్రి సమయాల్లో వీధి కుక్కలు చెత్తాచెదారాన్ని రోడ్లపై చెల్లాచెదురు చేస్తుండటంతో పరిసరాలు అపరిశుభ్రంగా మారుతున్నాయని తెలిపారు.
ముఖ్యంగా పాఠశాలలకు వెళ్లే చిన్నారులు, ఉదయం వాకింగ్కు వెళ్లే వృద్ధులు వీధి కుక్కల కారణంగా భయాందోళనలకు గురవుతున్నారని, ఈ సమస్య ప్రజలకు తీవ్ర ఇబ్బందిగా మారిందని పేర్కొన్నారు.
గతంలో చేపట్టిన చర్యల తరహాలోనే వీధి కుక్కల సమస్య నియంత్రణకు మరింత సమర్థవంతమైన చర్యలు చేపట్టాలని మున్సిపల్ అధికారులకు విజ్ఞప్తి చేశారు. ప్రజల భద్రత, ఆరోగ్యమే తమకు మొదటి ప్రాధాన్యత అని స్పష్టం చేశారు.
వీధి కుక్కల నియంత్రణకు చట్టబద్ధమైన నిబంధనలు, జంతు సంక్షేమ మార్గదర్శకాలకు అనుగుణంగా చర్యలు తీసుకుని, ప్రజలకు ఎలాంటి ఇబ్బందులు కలగకుండా చూడాలని కార్పొరేటర్ ఖాజా వలి షేక్ సంబంధిత అధికారులను కోరారు.
రిపోర్టర్ : మొయినుద్దీన్ అనంతపురం బ్యూరో మేజర్ న్యూస్