రూ.1.50 లక్షల లంచం తీసుకుంటూ ఏసీబీకి చిక్కిన పబ్లిక్ ప్రాసిక్యూటర్
సూర్య పెద్దపల్లి ప్రతినిధి: అవినీతి నిరోధక శాఖ (ఏసీబీ) అధికారులు మరో అవినీతి అధికారిని రెడ్హ్యాండెడ్గా పట్టుకున్నారు. పెద్దపల్లి జిల్లా కేంద్రంలో పబ్లిక్ ప్రాసిక్యూటర్ డొంకెన రవీందర్ రూ.1.50 లక్షలు లంచం తీసుకుంటుండగా బుధవారం కరీంనగర్ ఏసీబీ డీఎస్పీ మహేందర్రెడ్డి ఆధ్వర్యంలోని అధికారులు పట్టుకున్నారు.
వివరాల్లోకి వెళ్తే.. 2023లో ధర్మారం మండలం రచ్చపల్లిలో భూ వివాదానికి సంబంధించి జరిగిన ఘర్షణలో ఒకరు మృతి చెందారు. ఈ ఘటనపై మృతుడి కుమారుడి ఫిర్యాదు మేరకు నలుగురిపై కేసు నమోదైంది. ఈ కేసు విచారణలో నిందితులకు అనుకూలంగా వ్యవహరించి వారికి లబ్ధి చేకూరుస్తానని పబ్లిక్ ప్రాసిక్యూటర్ రవీందర్ రూ.2 లక్షలు లంచంగా డిమాండ్ చేసినట్లు సమాచారం. ఇందులో భాగంగా బుధవారం రూ.1.50 లక్షలు స్వీకరిస్తుండగా ఏసీబీ అధికారులు పక్కా ప్రణాళికతో దాడి చేసి పట్టుకున్నారు. ఈ ఘటనతో పెద్దపల్లి జిల్లాలో కలకలం రేగింది.