ప్రజా సమస్యల పరిష్కారంలో జర్నలిస్టుల పాత్ర కీలకం
సూర్య, లక్షెట్టిపేట/ మంచిర్యాల జిల్లా ప్రతినిధి : ప్రజా సమస్యలను ఎప్పటికప్పుడు వెలుగులోకి తీసుకువస్తూ, వాటి పరిష్కారం కోసం ప్రజలకు, ప్రభుత్వానికి మధ్య వారధులుగా జర్నలిస్టులు పనిచేస్తున్నారని ఆర్యవైశ్య మహాసభ రాష్ట్ర ముఖ్య సలహాదారు, మాజీ మున్సిపల్ చైర్మన్ నల్మాస్ కాంతయ్య, జిల్లా అధ్యక్షుడు కొత్త వెంకటేశ్వర్లు అన్నారు. సమాజ శ్రేయస్సు, ప్రజా సంక్షేమమే లక్ష్యంగా పాత్రికేయులు నిరంతరం కృషి చేస్తున్నారని కొనియాడారు.
జాతీయ పత్రికా దినోత్సవాన్ని పురస్కరించుకొని పట్టణ ఆర్యవైశ్య మహిళా సంఘం ఆధ్వర్యంలో మంగళవారం రాత్రి స్థానిక ఆర్యవైశ్య భవన్లో జర్నలిస్ట్ డే వేడుకలను ఘనంగా నిర్వహించారు. ఈ సందర్భంగా పట్టణంలో పనిచేస్తున్న సుమారు 30 మంది పాత్రికేయులను శాలువాలతో ఘనంగా సత్కరించి అభినందించారు.
ఈ కార్యక్రమానికి ముఖ్య అతిథులుగా హాజరైన నల్మాస్ కాంతయ్య, కొత్త వెంకటేశ్వర్లు మాట్లాడుతూ.. నేటి సమాజంలో జర్నలిస్టుల పాత్ర అత్యంత కీలకమైందని పేర్కొన్నారు. ప్రజలు ఎదుర్కొంటున్న సమస్యలు, ప్రభుత్వ పథకాల అమలులో ఎదురవుతున్న ఇబ్బందులు, సమాజంలో చోటుచేసుకుంటున్న అన్యాయాలను వార్తల రూపంలో వెలుగులోకి తీసుకువస్తూ సంబంధిత అధికారుల దృష్టికి తీసుకెళ్లడంలో పాత్రికేయులు కీలక పాత్ర పోషిస్తున్నారని అన్నారు. నిజాన్ని నిర్భయంగా ప్రజల ముందుంచుతూ సమాజ అభ్యున్నతికి తమ వంతు కృషి చేస్తున్న జర్నలిస్టుల సేవలు అభినందనీయమని తెలిపారు.
ప్రజల గొంతుకగా నిలుస్తూ, సామాన్యుల సమస్యలకు ప్రాధాన్యతనిస్తూ వార్తలు రాయడం ద్వారా ప్రజాస్వామ్య వ్యవస్థ బలోపేతానికి జర్నలిస్టులు కృషి చేస్తున్నారని పేర్కొన్నారు. పాత్రికేయులు వృత్తిపరమైన బాధ్యతలను నిబద్ధతతో నిర్వహిస్తూనే, తమ ఐక్యతను కాపాడుకోవాలని, జర్నలిస్టులు ఎదుర్కొంటున్న సమస్యల పరిష్కారం కోసం సంఘటితంగా ముందుకు సాగాలని సూచించారు.
పట్టణ ఆర్యవైశ్య మహిళా సంఘం అధ్యక్షురాలు నరేందుల సాహితి మాట్లాడుతూ.. సమాజంలో ప్రతిరోజూ జరిగే సంఘటనలను ప్రజలకు చేరవేస్తూ, వాస్తవాలను వెలుగులోకి తీసుకువస్తున్న జర్నలిస్టుల సేవలు చిరస్మరణీయమని అన్నారు. ప్రజలకు నిజానిజాలను తెలియజేయడంలో పాత్రికేయుల బాధ్యత ఎంతో గొప్పదని, ఎండనకా, వాననకా ప్రజా సమస్యలపై స్పందిస్తూ సమాచారాన్ని అందించడం అభినందనీయమని పేర్కొన్నారు. జర్నలిస్టులను గౌరవించడం, వారి సేవలను గుర్తించడం ప్రతి ఒక్కరి బాధ్యతగా భావించాలని తెలిపారు.
ఐక్య వ్యాపార సంఘం అధ్యక్షుడు మైలారపు సుధాకర్ మాట్లాడుతూ.. సమాజంలో అన్యాయాలకు గురవుతున్న నిరుపేదలకు జర్నలిస్టులు అండగా నిలుస్తున్నారని అన్నారు. బాధితుల సమస్యలను వార్తల రూపంలో ప్రభుత్వ యంత్రాంగం దృష్టికి తీసుకెళ్లి, వాటి పరిష్కారానికి కృషి చేయడం ద్వారా ప్రజలకు ఎంతో మేలు చేస్తున్నారని తెలిపారు. ప్రజాస్వామ్యంలో పాత్రికేయుల పాత్రను విస్మరించలేమని, వారి సేవలను గుర్తిస్తూ సన్మాన కార్యక్రమం నిర్వహించడం సంతోషకరమని అన్నారు. ఆ తర్వాత స్థానిక ప్రెస్ క్లబ్ అధ్యక్షులు బోనగిరి కుమార్ తో పాటు ప్రముఖ సీనియర్ జర్నలిస్ట్ లు వారి అనుభవాన్ని, జర్నలిస్ట్ ల ప్రస్తుత పరిస్థితులను పంచుకున్నారు.
అనంతరం కార్యక్రమానికి హాజరైన జర్నలిస్టులందరినీ ఆర్యవైశ్య మహిళా సంఘం నాయకులు శాలువాలు కప్పి ఘనంగా సత్కరించారు. ఈ సందర్భంగా పాత్రికేయులు కార్యక్రమ నిర్వాహకులకు కృతజ్ఞతలు తెలిపారు.
ఈ కార్యక్రమంలో మహిళా సంఘం ప్రధాన కార్యదర్శి పల్లెర్ల ఆరతి, కోశాధికారి కాసం స్వప్న, పట్టణ ఆర్యవైశ్య సంఘం అధ్యక్షుడు చెట్ల రమేష్, ప్రధాన కార్యదర్శి నల్మాస్ శ్రీనివాస్, వర్కింగ్ ప్రెసిడెంట్ ఓజ్జల శ్రీనివాస్, కోశాధికారి నరేందుల రమేష్, మండల ఆర్యవైశ్య సంఘం అధ్యక్షుడు గౌరిశెట్టి శ్రీనివాస్, వర్కింగ్ ప్రెసిడెంట్ కొంజర్ల ప్రసాద్, రాష్ట్ర ఆర్యవైశ్య మహాసభ పీఆర్వో కొంజర్ల శ్రీనివాస్, యువజన సంఘం అధ్యక్షుడు గడ్డం వికాస్, ప్రధాన కార్యదర్శి రంజిత్, జిల్లా యువజన సంఘం ప్రధాన కార్యదర్శి బొద్దుకూరి రాజ్ కుమార్, మహిళా సంఘం గౌరవ సలహాదారులు ఉత్తూరు రజిత, చెట్ల రమ్య తదితరులు పాల్గొన్నారు.