తాండూరులో రాజకీయ దుమారం.. బీఆర్ఎస్ కౌన్సిలర్ జావిద్ ముందస్తు అరెస్ట్
తాండూరు, మేజర్ న్యూస్: తాండూరు పట్టణంలో బీఆర్ఎస్ కౌన్సిలర్ జావిద్ ముందస్తు అరెస్ట్ వ్యవహారం రాజకీయ ఉద్రిక్తతకు దారితీసింది. పట్టణంలోని 8వ వార్డులో ఎమ్మెల్యే చేతుల మీదుగా సబ్రిజిస్ట్రార్ కార్యాలయ నిర్మాణానికి శంకుస్థాపన కార్యక్రమం నిర్వహించనున్న నేపథ్యంలో పోలీసులు కౌన్సిలర్ జావిద్ను ముందస్తుగా అదుపులోకి తీసుకున్నారు. ఈ విషయం తెలుసుకున్న కాలనీవాసులు పోలీసుల చర్యను అడ్డుకునే ప్రయత్నం చేయడంతో కొంతసేపు ఉద్రిక్త పరిస్థితి నెలకొంది. అయినప్పటికీ పోలీసులు జావిద్ను అదుపులోకి తీసుకుని గౌతాపూర్ పోలీస్ స్టేషన్కు తరలించారు. ఈ క్రమంలో కౌన్సిలర్ పోలీసులతో వాగ్వాదానికి దిగుతూ, తమ వార్డులో జరుగుతున్న అభివృద్ధి పనులపై ప్రశ్నించడం తప్పా? అని నిలదీసినట్లు తెలిసింది. మరోవైపు, తమ పార్టీ కౌన్సిలర్ను ముందస్తుగా అరెస్ట్ చేయడంపై బీఆర్ఎస్ నాయకులు తీవ్ర అభ్యంతరం వ్యక్తం చేశారు. ప్రజాప్రతినిధిని అరెస్ట్ చేయాల్సిన అవసరం ఏమొచ్చిందని పోలీసుల తీరును ప్రశ్నించారు. వార్డులో అభివృద్ధి పనులపై ప్రశ్నించినందుకే అరెస్ట్ చేశారా..? అంటూ నిలదీశారు. ఎమ్మెల్యే పర్యటన, శంకుస్థాపన కార్యక్రమం నేపథ్యంలో చోటుచేసుకున్న ఈ పరిణామాలు తాండూరు రాజకీయాల్లో చర్చనీయాంశంగా మారాయి. కౌన్సిలర్ ముందస్తు అరెస్టుకు గల కారణాలపై పోలీసుల అధికారిక వివరణ తెలియాల్సి ఉంది.