పులి సంచారంతో గ్రామాల్లో కలకలం.. ప్రజల్లో ఆందోళన పులి సంచరించిన ప్రాంతాన్ని పరిశీలించి, గ్రామస్తులతో మాట్లాడిన వడ్డి రఘురామ్ నాయుడు
తాడేపల్లిగూడెం, మేజర్ న్యూస్; తాడేపల్లిగూడెం మండలం ఆరుళ్ల, నందమూరు గ్రామాల పరిసర ప్రాంతాల్లో పులి సంచరిస్తున్న నేపథ్యంలో స్థానికంగా ఆందోళన నెలకొంది. ఈ నేపథ్యంలో తాడేపల్లిగూడెం నియోజకవర్గ వైఎస్సార్ కాంగ్రెస్ పార్టీ ఇంచార్జ్ వడ్డి రఘురామ్ నాయుడు పులి సంచరిస్తున్న ప్రాంతాన్ని సందర్శించి, గ్రామస్థులు మరియు రైతులతో మాట్లాడి పరిస్థితులను అడిగి తెలుసుకున్నారు. పులి ఎక్కడ కనిపించింది, ఏయే ప్రాంతాల్లో సంచరిస్తోంది, ప్రజలు ఎదుర్కొంటున్న ఇబ్బందులు ఏమిటనే వివరాలను తెలుసుకున్నారు. ఈ సందర్భంగా వడ్డి రఘురామ్ నాయుడు మాట్లాడుతూ ప్రజల భద్రతకు ప్రభుత్వం అత్యంత ప్రాధాన్యత ఇవ్వాలని కోరారు. అటవీశాఖ అధికారులు వెంటనే స్పందించి పులి కదలికలను గుర్తించేందుకు అవసరమైన చర్యలు చేపట్టాలని, నిరంతరం నిఘా ఉంచాలని సూచించారు. గ్రామస్థులు అప్రమత్తంగా ఉండాలని, పులి కనిపిస్తే దాని దగ్గరకు వెళ్లడం, వెంబడించడం వంటి చర్యలకు పాల్పడకూడదని తెలిపారు. వెంటనే అటవీశాఖ అధికారులకు సమాచారం అందించాలని కోరారు. ప్రజలకు ఎలాంటి ఇబ్బందులు కలగకుండా సంబంధిత అధికారులు సమన్వయంతో పనిచేసి, పులి సంచారంపై ఎప్పటికప్పుడు సమాచారం అందిస్తూ తగిన భద్రతా చర్యలు తీసుకోవాలని వడ్డి రఘురామ్ నాయుడు కోరారు. ఈ కార్యక్రమంలో వైఎస్సార్సీపీ నాయకులు, కార్యకర్తలు, గ్రామస్థులు తదితరులు పాల్గొన్నారు.
రిపోర్టర్ శ్రీనివాస్ తాడేపల్లిగూడెం పశ్చిమగోదావరి జిల్లా
