ప్రజాసేవే పరమావధిగా పనిచేయాలి.. ప్రజల మన్ననలు పొందాలి!* *నందిగాం మండల ప్రజా పరిషత్ కార్యాలయంలో 14 మంది ఎంపీటీసీల ప్రమాణ స్వీకారం*
*నందిగాం, నవంబర్ 19* మేజర్ న్యూస్
నందిగాం మండల ప్రజా పరిషత్ కార్యాలయంలో నూతన ప్రజాప్రతినిధులు కొలువుదీరారు. మండల పరిషత్ కార్యాలయంలో గురువారం నిర్వహించిన ప్రమాణ స్వీకార కార్యక్రమంలో 14 మంది ఎంపీటీసీ సభ్యులు బాధ్యతలు స్వీకరించారు. రిటర్నింగ్ అధికారి (ఆర్ఓ), మండల పరిషత్ అభివృద్ధి అధికారి (ఎంపీడీవో) పర్యవేక్షణలో జరిగిన ఈ కార్యక్రమంలో రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు సమక్షంలో ఎంపీటీసీ సభ్యులు ఒక్కొక్కరుగా ప్రమాణ స్వీకారం చేశారు.
ఈ సందర్భంగా నూతనంగా ప్రమాణ స్వీకారం చేసిన ఎంపీటీసీ సభ్యులందరికీ మంత్రి అచ్చెన్నాయుడు హృదయపూర్వక శుభాకాంక్షలు తెలియజేశారు. ప్రజలు తమపై పెట్టుకున్న నమ్మకాన్ని నిలబెట్టుకోవాల్సిన గురుతర బాధ్యత నూతన ప్రజాప్రతినిధులపై ఉందని పేర్కొన్నారు.
మంత్రి మాట్లాడుతూ.. ఈ విజయం కేవలం పదవులు దక్కించుకోవడమే కాదని, ప్రజలకు మరింత బాధ్యతతో సేవలందించాల్సిన బాధ్యతను పెంచిందని అన్నారు. పదవులను అధికారానికి ప్రతీకలుగా కాకుండా ప్రజాసేవకు వేదికలుగా భావించాలని సూచించారు. ప్రతి ఒక్కరూ ప్రజాసేవే పరమావధిగా ముందుకు సాగుతూ, ప్రజల సమస్యల పరిష్కారానికి చిత్తశుద్ధితో కృషి చేయాలని పిలుపునిచ్చారు.
గ్రామాల అభివృద్ధిలో క్రియాశీలక పాత్ర పోషిస్తూ, ప్రజలకు ఎల్లప్పుడూ అందుబాటులో ఉండాలని, వారి అవసరాలను గుర్తించి పరిష్కారానికి చొరవ చూపాలని సూచించారు. ప్రజల ఆదరాభిమానాలు, మన్ననలు పొందేలా అంకితభావంతో పనిచేయాలని నూతన ఎంపీటీసీ సభ్యులకు మంత్రి దిశానిర్దేశం చేశారు.
కార్యక్రమంలో ప్రజాప్రతినిధులు, అధికారులు, కూటమి నాయకులు, కార్యకర్తలు తదితరులు పాల్గొన్నారు.
రిపోర్టర్ శ్రీనివాస్