వంద మందికి మించితే ముందస్తు సమాచారం తప్పనిసరి. సైబరాబాద్ మున్సిపల్ కార్పొరేషన్ మార్గదర్శకాలు
సైబరాబాద్,మేజర్ న్యూస్ : వంద మందికి పైగా పాల్గొనే కార్యక్రమాలు, సమావేశాల నిర్వహణకు సంబంధించి సైబరాబాద్ మున్సిపల్ కార్పొరేషన్ (CMC) కీలక మార్గదర్శకాలు జారీ చేసింది. ఘన వ్యర్థాల నిర్వహణ నిబంధనల్లోని రూల్ 5(1)(j) ప్రకారం ఈ మేరకు డిప్యూటీ కమిషనర్లకు ఆదేశాలు ఇచ్చింది.ఈ సందర్భంగా
అనుమతి లేని ప్రదేశాల్లో వంద మందికి పైగా పాల్గొనే కార్యక్రమాలు నిర్వహించేవారు కనీసం మూడు పనిదినాల ముందుగానే కేంద్ర కాలుష్య నియంత్రణ మండలి (CPCB) ఈవెంట్ ఇంటిమేషన్ పోర్టల్ ద్వారా సంబంధిత స్థానిక సంస్థకు సమాచారం ఇవ్వాలి. కార్యక్రమం జరిగే ప్రదేశంలో తడి, పొడి తదితర వ్యర్థాలను నిర్దేశిత వర్గాలుగా వేరు చేయాలి. వాటిని స్థానిక సంస్థ గుర్తించిన అధీకృత సేకరణదారులు లేదా ఏజెన్సీలకు అప్పగించాలి. వ్యర్థాల సేకరణ, రవాణా, శాస్త్రీయ పద్ధతిలో పారవేతకు నిర్వాహకులే తగిన ఏర్పాట్లు చేసుకోవాలి.ఈ నిబంధనలపై ఫంక్షన్ హాళ్ల యాజమాన్యాలు, ఈవెంట్ మేనేజ్మెంట్ సంస్థలు, కార్యక్రమాల నిర్వాహకులకు విస్తృతంగా అవగాహన కల్పించాలని డిప్యూటీ కమిషనర్లను కమిషనర్ ఆదేశించారు. CPCB పోర్టల్ వినియోగం, ముందస్తు సమాచారం సమర్పణపై వివరించాలన్నారు. నిబంధనల అమలును క్షేత్రస్థాయిలో పర్యవేక్షించాలని, శానిటేషన్ అధికారులు, సిబ్బందితో సమన్వయం చేసుకోవాలని సూచించారు. సైబరాబాద్ పరిధిలో జరిగే అన్ని బహిరంగ కార్యక్రమాలు, సమావేశాల్లో ఈ మార్గదర్శకాలు ఖచ్చితంగా అమలయ్యేలా చర్యలు తీసుకోవాలని స్పష్టం చేశారు