అర్హులందరికీ చేయూత పింఛన్లు అందిస్తాం : ఎమ్మెల్యే గాంధీ
శేరిలింగంపల్లి,మేజర్ న్యూస్ : అర్హులైన ప్రతి ఒక్కరికీ చేయూత పింఛన్లు అందిస్తామని, సంక్షేమ పథకాల అమలు నిరంతర ప్రక్రియ అని పీఏసీ ఛైర్మన్ ఆరెకపూడి గాంధీ అన్నారు. చందానగర్ డివిజన్లోని డాక్టర్ బీఆర్ అంబేడ్కర్ కళ్యాణమండపంలో నిర్వహించిన చేయూత పింఛన్లు మంజూరు పత్రాల పంపిణీ కార్యక్రమంలో ఆయన ముఖ్యఅతిథిగా పాల్గొని జోనల్ కమిషనర్ నారాయణ్ అమిత్ మాలెంపాటి, టీపీసీసీ రాష్ట్ర ప్రధాన కార్యదర్శి, శేరిలింగంపల్లి నియోజకవర్గ కాంగ్రెస్ ఇన్చార్జి వి. జగదీశ్వర్ గౌడ్, మాజీ కార్పొరేటర్ మంజుల రఘునాథ్రెడ్డి, డీసీలు శ్రీనివాస్, బాలకృష్ణ, ప్రాజెక్టు అధికారి సురేష్, సీనియర్ నాయకుడు మొవ్వ సత్యనారాయణ మియాపూర్, మాదాపూర్ సర్కిళ్ల పరిధిలోని 957 మంది లబ్ధిదారులకు మంజూరు పత్రాలు అందజేశారు.ఈ సందర్భంగా ఎమ్మెల్యే గాంధీ మాట్లాడుతూ.. వృద్ధులు, వితంతువులు, దివ్యాంగులు, ఒంటరి మహిళలు, కల్లుగీత, చేనేత కార్మికులు, పైలేరియా, డయాలసిస్ బాధితులకు ఆర్థిక భరోసా కల్పించడమే ప్రభుత్వ లక్ష్యమన్నారు. ముఖ్యమంత్రి రేవంత్రెడ్డి నేతృత్వంలో పేదల సంక్షేమానికి ప్రభుత్వం పెద్దపీట వేస్తోందని తెలిపారు. అర్హులైన వారుఎవరూ ఆందోళన చెందాల్సిన అవసరం లేదని, ప్రతి ఒక్కరికీ సంక్షేమ ఫలాలు అందిస్తామని పేర్కొన్నారు.ఈ కార్యక్రమంలో అధికారులు,నాయకులు,కార్యకర్తలు లబ్ధిదారులు తదితరులు పాల్గొన్నారు.