ప్రజా సమస్యలపై పోరాడడమే కామ్రేడ్ మల్లికార్జునరావుకు ఘన నివాళి

దేవరపల్లి, అక్టోబర్ 11 మేజర్ న్యూస్: ప్రజా సమస్యలపై నిరంతరం పోరాడటమే కామ్రేడ్ యర్రా మల్లికార్జునరావుకు ఘన నివాళి అని సీపీఎం జిల్లా కమిటీ సభ్యులు ఎం. సుందరబాబు అన్నారు. ఆదివారం విశ్రాంతి ఉద్యోగుల భవనంలో కె. రత్నాజీ అధ్యక్షతన జరిగిన మల్లికార్జునరావు 6వ వర్ధంతి సభలో నాయకులు ఆయన చిత్రపటానికి పూలమాలలేసి నివాళులర్పించారు.

ఈ సందర్భంగా సుందరబాబు, సీనియర్ నాయకులు ఉండవల్లి కృష్ణారావు మాట్లాడుతూ'అచ్ఛే దిన్', నోట్ల రద్దు పేరుతో ప్రజలను మోసం చేస్తూ కేంద్రంలోని బీజేపీ ప్రభుత్వం అంబానీ, అదానీల సంపదను పెంచుతోందని విమర్శించారు. రాజ్యాంగ వ్యవస్థలను ధ్వంసం చేస్తున్న కేంద్ర విధానాలపై, దానికి మద్దతు ఇస్తున్న రాష్ట్ర కూటమి ప్రభుత్వంపై నిరంతరం ఉద్యమించాలని పిలుపునిచ్చారు.
ఈ కార్యక్రమంలో పార్టీ కార్యదర్శి ఎస్. భగత్, లక్ష్మి, చాపల నీలం, అడపా సూర్యరావు, గోవర్ధన్, ఎస్‌ఎఫ్‌ఐ నాయకుడు హర్ష, ఆటో యూనియన్ నాయకుడు సిర్రా రాజు తదితరులు పాల్గొన్నారు.