పశ్చిమ వైసీపీ కార్పొరేటర్ అభ్యర్థులకు బి-ఫారాలు అందజేత

విజయవాడ పశ్చిమ, మేజర్ న్యూస్: విజయవాడ పశ్చిమ నియోజకవర్గ పరిధిలోని 31 నుంచి 58వ డివిజన్ల వరకు పోటీ చేస్తున్న వైఎస్సార్ కాంగ్రెస్ పార్టీ కార్పొరేటర్ అభ్యర్థులకు మాజీ మంత్రి వెలంపల్లి శ్రీనివాసరావు మంగళవారం బి-ఫారాలు అందజేశారు. బ్రాహ్మణ వీధిలోని వైసీపీ పశ్చిమ నియోజకవర్గ కార్యాలయంలో జరిగిన ఈ కార్యక్రమంలో నగర మేయర్ అభ్యర్థి రాయన భాగ్యలక్ష్మి, ఎమ్మెల్సీ రుహుల్లా పాల్గొన్నారు. ఈ సందర్భంగా వెలంపల్లి మాట్లాడుతూ, పార్టీ అధినేత వైఎస్ జగన్‌మోహన్‌రెడ్డి ఆశీస్సులతో పోటీ చేస్తున్న అభ్యర్థులు క్షేత్రస్థాయిలో విస్తృతంగా ప్రచారం నిర్వహించి విజయం సాధించాలని పిలుపునిచ్చారు. కూటమి ప్రభుత్వం ఎన్నికల హామీలను అమలు చేయడంలో విఫలమైందని విమర్శించారు. నిత్యావసర వస్తువుల ధరల పెరుగుదలతో ప్రజలు ఎదుర్కొంటున్న ఇబ్బందులను ప్రజల్లోకి తీసుకెళ్లాలని సూచించారు. గత వైఎస్సార్‌సీపీ ప్రభుత్వ హయాంలో అమలు చేసిన సంక్షేమ పథకాలను ప్రజలకు వివరించాలని, పార్టీ నాయకులు, కార్యకర్తలు సమన్వయంతో పనిచేసి అభ్యర్థుల విజయానికి కృషి చేయాలని కోరారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.