ఓటు హక్కుకు మరో అవకాశం! 'అర్హుడి ఓటు గల్లంతు కాకూడదు.. ఇంటింట మళ్లీ సర్వే'

గోపాలపురం, (మేజర్ న్యూస్): ఓటు హక్కు ఉన్నా.. జాబితాలో లేకపోతే ఆ హక్కుకు విలువేది? ఈ ప్రశ్నకు సమాధానంగా గోపాలపురం నియోజకవర్గంలో ఇంటింటా పునఃపరిశీలన పర్వం గురువారం మొదలైంది.
ఈ సందర్భంగా ఓటరు నమోదు అధికారి పి.భాగ్యవతి మాట్లాడుతూ.. 'ఒక్క అర్హుడి ఓటు కూడా గల్లంతు కాకూడదు.. ఒక్క అనర్హుడి పేరూ మిగలకూడదన్నదే మా లక్ష్యం. అందుకే తొలగించిన ఓటర్ల జాబితాలను మరోసారి ఇంటింటా పరిశీలించేందుకు శ్రీకారం చుట్టాం' అని తెలిపారు.

ప్రత్యేక సమగ్ర సవరణ (ఎస్ఐఆర్) ప్రారంభ సమయంలో నియోజకవర్గంలో 2,43,471 మంది ఓటర్లు ఉన్నారని ఆమె వివరించారు. "ఇందులో మృతులు 8,659 మంది, శాశ్వతంగా వలస వెళ్లినవారు 3,485 మంది, రెండు చోట్ల ఓట్లు కలిగినవారు 3,186 మంది, ఆచూకీ లేనివారు 885 మంది ఉన్నట్లు గుర్తించాం. ఇలా మొత్తం 16,215 మందిని తొలగించగా, మిగిలిన 2,27,204 మంది ఓటర్లతో జూలై 31న ముసాయిదా జాబితా ప్రచురించాం అని చెప్పారు.
తాజాగా బూత్ స్థాయి అధికారులు ఇంటింటికీ వెళ్లి ఈ జాబితాలను పునఃపరిశీలిస్తారు. అందులో అర్హులైన ఓటర్లు కనిపిస్తే వారితో ఫారం-6 ద్వారా దరఖాస్తు చేయిస్తారు. అలాగే సంబంధిత పోలింగ్ కేంద్రాల బూత్ స్థాయి ఏజెంట్లతో సమావేశాలు నిర్వహించి, జాబితాలను చదివి వినిపించాలని ఆదేశాలు జారీ చేశాం అని పేర్కొన్నారు.

ఈ ప్రక్రియలో అందరూ భాగస్వాములు కావాలని ఆమె విజ్ఞప్తి చేశారు. "రాజకీయ పార్టీల ప్రతినిధులు, నాయకులు, గ్రామపెద్దలు, ప్రజలు, బూత్ స్థాయి ఏజెంట్లు కూడా ఈ జాబితాలను పరిశీలించాలి. అర్హులైన వారు ఓటు హక్కు పొందేలా ఫారం-6 ద్వారా దరఖాస్తు చేసుకునేందుకు సహకరించాలి" అని కోరారు.