ఓటరు తీర్పునకు వేళాయె.. పోలింగ్‌కు సర్వం సిద్ధం!

                                  ఎన్నికల ఏర్పాట్లపై జాయింట్ కలెక్టర్ క్షేత్రస్థాయి పరిశీలన

కడియం, మేజర్ న్యూస్,:కడియం మండలంలో స్థానిక సంస్థల ఎన్నికలకు సంబంధించి అధికార యంత్రాంగం అన్ని ఏర్పాట్లు పూర్తి చేసింది. మండల పరిధిలోని 22 ఎంపీటీసీ స్థానాలతో పాటు ఒక జడ్పీటీసీ స్థానానికి గురువారం పోలింగ్ జరగనుండగా, ఎన్నికల నిర్వహణకు అవసరమైన ఏర్పాట్లను అధికారులు సిద్ధం చేశారు.
ఈ నేపథ్యంలో మండల కేంద్రమైన కడియంలోని జీఎన్ఆర్ కల్యాణ మండపంలో ఏర్పాటు చేసిన ఎన్నికల డిస్ట్రిబ్యూషన్ కేంద్రాన్ని బుధవారం జాయింట్ కలెక్టర్ మేఘస్వరూప్ సందర్శించి పరిశీలించారు. పోలింగ్ సిబ్బందికి ఎన్నికల సామగ్రి పంపిణీ, విధుల కేటాయింపు, పోలింగ్ కేంద్రాలకు సిబ్బంది తరలింపు తదితర అంశాలపై అధికారులను వివరాలు అడిగి తెలుసుకున్నారు. ఎన్నికల సామగ్రి పంపిణీలో ఎలాంటి జాప్యం లేకుండా, సిబ్బంది సకాలంలో తమకు కేటాయించిన కేంద్రాలకు చేరుకోవాలని సూచించారు.
ఓటర్లు స్వేచ్ఛగా తమ ఓటు హక్కును వినియోగించుకునేలా అవసరమైన సౌకర్యాలు కల్పించాలని, ఎన్నికల నిబంధనలను పక్కాగా అమలు చేయాలని అధికారులను ఆదేశించారు. ఎన్నికల ప్రక్రియ ప్రశాంతంగా, పారదర్శకంగా జరిగేలా అన్ని శాఖల అధికారులు సమన్వయంతో పనిచేయాలని స్పష్టం చేశారు.
ఈ పరిశీలనలో ఆర్వో మల్లికార్జున్, ఎంపీడీవో కే. రమేష్, జోనల్ ఆఫీసర్ సుధీర్, తహసీల్దార్ ఎం. శ్రీనివాస్ తదితరులు పాల్గొన్నారు. ఎన్నికల ఏర్పాట్లు పూర్తికావడంతో కడియం మండలంలో రాజకీయ సందడి నెలకొంది. అభ్యర్థుల భవితవ్యాన్ని నిర్ణయించే ఓటరు తీర్పుపై సర్వత్రా ఆసక్తి నెలకొంది.