నెల్లూరులో ఘనంగా వికసిత భారత్ యువ నాయకుల సంభాషణ – 2027 యువజన పార్లమెంట్

నెల్లూరు  కలెక్టరేట్ , మేజర్ న్యూస్  :    నెల్లూరు నగరంలోని నారాయణ ఇంజినీరింగ్ కళాశాలలో మేరా యువ భారత్ ఆధ్వర్యంలో 'వికసిత భారత్ యువ నాయకుల సంభాషణ – 2027' యువజన పార్లమెంట్ కార్యక్రమాన్ని ఘనంగా నిర్వహించారు. ఈ కార్యక్రమానికి విక్రమసింహపురి విశ్వవిద్యాలయ ఉపకులపతి ప్రొఫెసర్ అల్లం శ్రీనివాసరావు, నారాయణ వైద్య కళాశాల సంచాలకులు డాక్టర్ పి. శ్రీనివాసులు రెడ్డి, నారాయణ ఇంజినీరింగ్ కళాశాల ప్రిన్సిపాల్ డాక్టర్ వి. రవిప్రసాద్ ముఖ్య అతిథులుగా హాజరయ్యారు.

ముందుగా ముఖ్య అతిథులు జ్యోతి ప్రజ్వలన చేసి కార్యక్రమాన్ని ప్రారంభించారు. అనంతరం విద్యార్థులు ప్రదర్శించిన సాంస్కృతిక కార్యక్రమాలు సభికులను విశేషంగా ఆకట్టుకున్నాయి.

ఈ సందర్భంగా జిల్లా యువజన అధికారి బి. శశికాంత్ రెడ్డి మాట్లాడుతూ, యువతలో నాయకత్వ లక్షణాలను పెంపొందించడం, ప్రజాస్వామ్య వ్యవస్థపై సంపూర్ణ అవగాహన కల్పించడమే యువజన పార్లమెంట్ ప్రధాన ఉద్దేశమని తెలిపారు. వికసిత భారత్ – 2047 లక్ష్య సాధనలో యువత పాత్ర అత్యంత కీలకమని, నవభారత నిర్మాణంలో యువత సరికొత్త ఆలోచనలతో ముందుకు రావాలని పిలుపునిచ్చారు.

విక్రమసింహపురి విశ్వవిద్యాలయ ఉపకులపతి ప్రొఫెసర్ అల్లం శ్రీనివాసరావు మాట్లాడుతూ, ప్రస్తుత సమాజంలో యువత కేవలం ఉద్యోగాలకే పరిమితం కాకుండా నాయకులుగా, నూతన ఆవిష్కర్తలుగా ఎదగాలని సూచించారు. పార్లమెంటరీ విధానాలు, చట్టాల రూపకల్పన, సమకాలీన అంశాలపై యువతకు అవగాహన అవసరమని పేర్కొన్నారు. ఇలాంటి కార్యక్రమాలు విద్యార్థుల్లో సృజనాత్మకతను, వక్తృత్వ నైపుణ్యాలను వెలికితీస్తాయని తెలిపారు.

నారాయణ వైద్య కళాశాల సంచాలకులు డాక్టర్ పి. శ్రీనివాసులు రెడ్డి మాట్లాడుతూ, క్రమశిక్షణ, సామాజిక స్పృహ ఉన్నప్పుడే యువత సరైన మార్గంలో పయనిస్తుందని అన్నారు. యువశక్తిని సరైన దిశలో వినియోగిస్తే దేశం అన్ని రంగాల్లోనూ అగ్రగామిగా నిలుస్తుందని పేర్కొన్నారు. విద్యార్థులు విద్యాభ్యాసంతో పాటు నాయకత్వ నైపుణ్యాలను కూడా పెంపొందించుకోవాలని సూచించారు.

అనంతరం నిర్వహించిన యువజన పార్లమెంట్‌లో విద్యార్థులు వివిధ సమకాలీన అంశాలపై పార్లమెంట్ సభ్యుల తరహాలో చర్చలు, వాదనలు, ప్రతివాదనలు, సమాధానాలతో నమూనా సభను నిర్వహించి ఆకట్టుకున్నారు.

ఈ కార్యక్రమంలో నారాయణ ఇంజినీరింగ్ కళాశాల ప్రిన్సిపాల్ డాక్టర్ వి. రవిప్రసాద్, జాతీయ సేవా పథకం కార్యక్రమ అధికారులు కార్తీక్, చంద్రమోహన్, వివిధ విభాగాల అధిపతులు, అధ్యాపకులు, పెద్ద సంఖ్యలో విద్యార్థులు పాల్గొన్నారు.