నగర సంకీర్తనతో ఆధ్యాత్మిక మేలుకొలుపు

రామచంద్రపురం నియోజవర్గం మండల కేంద్రమైన కె గంగవరంలో కార్తీక మాసాన్ని పురస్కరించుకుని శ్రీ భక్తాంజనేయ బాల భక్త సమాజం,బృందావన విహారి బృందం ఆధ్వర్యంలో నగర సంకీర్తన కార్యక్రమాన్ని భక్తిశ్రద్ధలతో నిర్వహిస్తున్నారు.మంగళవారం కార్తీక శుద్ధ పాడ్యమి నుంచి ప్రారంభమైన ఈ కార్యక్రమాన్ని కార్తీక మాసమంతా ప్రతిరోజూ తెల్లవారుజామున బ్రహ్మముహూర్తంలో గ్రామ వీధుల్లో కొనసాగించనున్నారు.పరమేశ్వరునికి అత్యంత ప్రీతికరమైన కార్తీక మాసంలో పూర్వీకులు అందించిన ఆధ్యాత్మిక సంప్రదాయాలను భావితరాలకు అందించాలనే సంకల్పంతో ఈ కార్యక్రమానికి శ్రీకారం చుట్టారు.తెల్లవారుజామున భక్తులు గ్రామ వీధుల్లో పర్యటిస్తూ లయబద్ధమైన భజనలు,కీర్తనలతో భగవన్నామ స్మరణ చేస్తున్నారు.దీంతో గ్రామంలో ఆధ్యాత్మిక వాతావరణం వెల్లివిరుస్తోంది.కనుమరుగవుతున్న హిందూ సంస్కృతి,సంప్రదాయాల గొప్పతనాన్ని నేటి యువతకు పరిచయం చేయడం,వారిలో భక్తిభావం,ఆధ్యాత్మిక చింతన పెంపొందించడం,గ్రామ శ్రేయస్సును ఆకాంక్షించడం ఈ కార్యక్రమ ప్రధాన ఉద్దేశమని నిర్వాహకులు తెలిపారు.మన సంస్కృతి,సంప్రదాయాలను భావితరాలకు వారసత్వ సంపదగా అందించాలనే సదుద్దేశంతో నగర సంకీర్తనను నిర్వహిస్తున్నట్లు వారు పేర్కొన్నారు.ఈ కార్యక్రమంలో దునే ఏసు ,దునే శ్రీనివాస్,లక్ష్మి శ్రీనివాస్,గంగాపాత్రుల సత్యనారాయణ,పెంటపాటి జానకి,బృందావన విహారి బృందానికి చెందిన లక్ష్మీ పద్మావతి,గంగాపాత్రుల సత్యనారాయణమ్మ,దునే లత తదితరులు పాల్గొంటున్నారు.