నాగుల చవితి ప్రత్యేకం: పెద్ద శేష వాహనంపై శ్రీదేవి, భూదేవి సమేత మలయప్పస్వామి దర్శనం

తిరుమల :నాగుల చవితి పర్వదినాన్ని పురస్కరించుకుని శుక్రవారం రాత్రి తిరుమలలో శ్రీదేవి, భూదేవి సమేత శ్రీ మలయప్పస్వామివారు పెద్ద శేష వాహనంపై భక్తులకు కనువిందు చేశారు. రాత్రి 7 గంటల నుండి స్వామి, అమ్మవార్లు నాలుగు మాడ వీధుల్లో ఊరేగుతూ భక్తులకు దర్శనమివ్వగా, పెద్ద సంఖ్యలో భక్తులు తరలివచ్చి స్వామివారిని దర్శించుకుని కర్పూర నీరాజనాలు సమర్పించారు. సర్పరాజైన ఆదిశేషువు జగన్నాథునికి నివాస భూమిగా, తల్పంగా, సింహాసనంగా సేవలందించినట్లు పురాణాలు చెబుతుండగా, శ్రీవేంకటేశ్వరస్వామి శేషసాయిగా, శేషాద్రి నిలయునిగా నిత్య పూజలు అందుకుంటున్నారు. రామావతారంలో లక్ష్మణుడిగా, కృష్ణావతారంలో బలరామునిగా స్వామివారికి అత్యంత సన్నిహితునిగా వ్యవహరించే ఆదిశేషువు శ్రీవైకుంఠంలోని నిత్యసూరులలో ఆద్యుడు కావడంతో, స్వామివారు ఉభయ దేవేరులతో కలిసి తన ప్రియ భక్తునిపై ఊరేగుతూ శరణాగతి తత్వాన్ని చాటిచెప్పారు. ఈ వాహన సేవలో టీటీడీ అదనపు ఈవో సి.హెచ్. వెంకయ్య చౌదరి, తిరుపతి జేఈవో డాక్టర్ శరత్, శ్రీవారి ఆలయ డిప్యూటీ ఈవో భాస్కర్, వీజీవో సురేంద్ర, పేష్కార్ రామకృష్ణ తదితర అధికారులు పాల్గొన్నారు.