andhrapradesh
మేయర్, కార్పొరేటర్ల ప్రమాణ స్వీకారంపై విమర్శలకు కూటమి నేతల కౌంటర్..
విజయవాడ, నవంబర్ 21: విజయవాడ నగరపాలక సంస్థ (వీఎంసీ) నూతన మేయర్, కార్పొరేటర్ల ప్రమాణ స్వీకార కార్యక్రమం ఈ నెల 23వ తేదీన జరగనుంది. ఈ వేడుక వేదిక ఎంపికపై ప్రతిపక్షాలు చేస్తున్న విమర్శలను కూటమి నేతలు, నూతన మేయర్ వంగవీటి రాధాకృష్ణ, విజయవాడ ఎంపీ కేశినేని శివనాథ్ (చిన్ని), టీడీపీ సీనియర్ నేత బుద్ధా వెంకన్న తీవ్రంగా తిప్పికొట్టారు. శనివారం విజయవాడలో నిర్వహించిన మీడియా సమావేశంలో వారు మాట్లాడుతూ విపక్షాల తీరుపై మండిపడ్డారు.
ప్రమాణ స్వీకార కార్యక్రమంపై కొందరు రకరకాలుగా మాట్లాడుతున్నారని, విమర్శలు చేసే ముందు వారు అసలు నిబంధనలు (రూల్ పొజిషన్) ఏంటో తెలుసుకోవాలని మేయర్ వంగవీటి రాధా సూచించారు. భారత రాజ్యాంగ నిర్మాత డాక్టర్ బీఆర్ అంబేద్కర్ను అవమానించేలా కొందరి వ్యవహారం ఉందని ఆయన ఆవేదన వ్యక్తం చేశారు. తమది కేవలం మాటల ప్రభుత్వం కాదని, ప్రజలకు సేవ చేసే చేతల ప్రభుత్వమని వంగవీటి రాధా స్పష్టం చేశారు.
విజయవాడ ఎంపీ కేశినేని చిన్ని మాట్లాడుతూ.. ఇటీవల జరిగిన విజయవాడ కార్పొరేషన్ ఎన్నికలు అత్యంత ప్రశాంతంగా జరిగాయని, నగరంలోని 98.4 శాతం డివిజన్లలో కూటమి అభ్యర్థులు ఘన విజయం సాధించారని పేర్కొన్నారు.
ఈ సందర్భంగా టీడీపీ నేత బుద్ధా వెంకన్న మాట్లాడుతూ.. కుల, మతాల మధ్య చిచ్చు పెట్టి రాజకీయ లబ్ధి పొందాలని చూస్తున్నారని విపక్షాలపై ధ్వజమెత్తారు.