telangana
వెంకటాపూర్లో లబ్ధిదారులకు ఆసరా పింఛన్ల పంపిణీ
సూర్య, మందమర్రి : గ్రామీణ ప్రాంతాల్లోని నిరుపేద కుటుంబాలకు ప్రభుత్వ సంక్షేమ పథకాలు అండగా నిలుస్తున్నాయి. ముఖ్యంగా వృద్ధులు, దివ్యాంగులు, ఇతర అర్హులైన వారికి అందించే ఆసరా పింఛన్లు వారి జీవనానికి ఆర్థిక భరోసానిస్తున్నాయి. ఇందులో భాగంగా మండలంలోని వెంకటాపూర్ గ్రామంలో శనివారం సర్పంచ్ సేగ్యం వెంకటేష్ ఆధ్వర్యంలో చేయూత ఆసరా పింఛన్ల పంపిణీ చేపట్టారు. ఈ సందర్భంగా గ్రామంలోని అర్హులైన లబ్ధిదారులకు పింఛన్లను పంపిణీ చేశారు. ప్రభుత్వ సంక్షేమ ఫలాలు అర్హులకు చేరేలా ప్రజాప్రతినిధులు, అధికారులు సమన్వయంతో పనిచేయాల్సిన అవసరం ఉందని ఈ కార్యక్రమం ద్వారా చాటిచెప్పారు. పింఛన్లు అందుకున్న లబ్ధిదారులు సంతోషం వ్యక్తం చేశారు. ఈ కార్యక్రమంలో పంచాయతీ కార్యదర్శి రాజేష్, ఉప సర్పంచ్, వార్డు సభ్యులు, కాంగ్రెస్ పార్టీ నాయకులు, కార్యకర్తలు, గ్రామ ప్రజలు పాల్గొన్నారు.