విశాఖ ఉక్కు అమ్మకాన్ని తక్షణమే ఆపాలి
గాజువాక, మేజర్ న్యూస్ : విశాఖ ఉక్కు కర్మాగారాన్ని కార్పొరేట్లకు అప్పగించే ప్రయత్నాలను కేంద్రంలోని భాజపా ప్రభుత్వం తక్షణమే విరమించుకోవాలని స్టీల్ సీఐటీయూ అధ్యక్షుడు యు.రామస్వామి డిమాండ్ చేశారు. అఖిల భారత సీఐటీయూ పిలుపు మేరకు డిసెంబరు 1, 2, 3 తేదీల్లో నిర్వహించే ‘చలో దిల్లీ’ కార్యక్రమ గోడపత్రికలను శనివారం ఉక్కునగరంలోని స్మృత్యాంజలి పార్క్ వద్ద నాయకులతో కలిసి ఆయన ఆవిష్కరించారు. ఈ సందర్భంగా రామస్వామి మాట్లాడుతూ.. దేశంలోని మరో నాలుగు ఉక్కు పరిశ్రమల ప్రైవేటీకరణ నిర్ణయాన్ని ఉపసంహరించుకున్న కేంద్రం, విశాఖ ఉక్కు విషయంలోనే మొండిగా వ్యవహరిస్తోందని మండిపడ్డారు. నాలుగు లేబర్ కోడ్ల నిరంకుశ అమలు, వేతన సవరణ నిలిపివేత, పనిభారం పెంపు వంటి కార్మిక వ్యతిరేక విధానాలకు నిరసనగా తలపెట్టిన ‘చలో దిల్లీ’లో కార్మికులు పెద్ద సంఖ్యలో పాల్గొని జయప్రదం చేయాలని పిలుపునిచ్చారు. కార్యక్రమంలో సీపీఎం స్టీల్ డివిజన్ కార్యదర్శి పి.శ్రీనివాసరాజు, సీఐటీయూ నాయకులు మరిడయ్య, బి.మహేష్, టి.వి.కె.రాజు, మొహిద్దిన్, తిమోతి బాబు, పవన్, బొంజు బాబు, అప్పలరాజు, మురళి, నాగబాబు, సిహెచ్.వెంకట్రావు తదితరులు పాల్గొన్నారు.
రిపోర్టర్ : పీ. కోటిరెడ్డి, గాజువాక ఇంచార్జ్, విశాఖపట్నం