ఏ.కొండూరులో పులి సంచారంపై పవన్ కల్యాణ్ సమీక్ష..
అమరావతి: ఎన్టీఆర్ జిల్లా ఏ.కొండూరు పరిసర ప్రాంతాల్లో పులి సంచారం నేపథ్యంలో ఉప ముఖ్యమంత్రి, అటవీ పర్యావరణ శాఖ మంత్రి పవన్ కల్యాణ్ ఉన్నతాధికారులతో సమీక్ష నిర్వహించారు. పులి కదలికలపై నిరంతర నిఘా ఏర్పాటు చేయాలని, దానికి ఎలాంటి హాని కలగకుండా ప్రజల భద్రతకు తక్షణ చర్యలు తీసుకోవాలని ఆయన ఆదేశించారు. దట్టమైన ప్రాంతాల్లో పులి జాడను గుర్తించేందుకు థర్మల్ డ్రోన్లు, ఏఐ (AI) కెమెరాలను వినియోగించాలని సూచించారు. పులి ఏయే మార్గాల్లో సంచరిస్తోందో గుర్తించడంతో పాటు, 'హనుమాన్' బృందాలతో ప్రభావిత గ్రామాల్లో విస్తృతంగా గస్తీ నిర్వహించాలని స్పష్టం చేశారు. అవసరమైతే పులిని సురక్షితంగా బంధించేందుకు ఇతర రాష్ట్రాల నుంచి నిపుణులైన రెస్క్యూ బృందాలను పిలిపించాలని అధికారులకు దిశానిర్దేశం చేశారు.