కాకినాడ ప్రభుత్వాసుపత్రిలో దారుణం: ప్రసవం తర్వాత కడుపులోనే దూది, కత్తెర.. వైద్యుల తీవ్ర నిర్లక్ష్యంపై బంధువుల ఆగ్రహం!

సూర్య బ్యూరో, కాకినాడ: కాకినాడ ప్రభుత్వ సర్వజన ఆసుపత్రి (GGH)లో వైద్యుల తీవ్ర నిర్లక్ష్యం మరోసారి బయటపడింది. ప్రసవం కోసం చేరిన ఓ మహిళకు శస్త్రచికిత్స నిర్వహించిన వైద్యులు, అనంతరం కడుపులోనే దూది (కాటన్), కత్తెరను వదిలేసి కుట్లు వేసిన అమానవీయ ఘటన తీవ్ర కలకలం రేపింది. ప్రభుత్వ వైద్యుల నిర్లక్ష్యానికి నిండు ప్రాణం ప్రమాదంలో పడటంతో బాధితురాలి కుటుంబ సభ్యులు ఆందోళనకు దిగారు.

ప్రసవానంతరం మహిళ తీవ్రమైన కడుపునొప్పి, తీవ్ర అస్వస్థతతో విలవిల్లాడటంతో కుటుంబ సభ్యులు వైద్యులను సంప్రదించారు. అయితే నొప్పి తగ్గడం లేదని పలుమార్లు విజ్ఞప్తి చేయడంతో స్కానింగ్ పరీక్షలు నిర్వహించగా, కడుపులోనే సర్జికల్ కత్తెర, కాటన్ ఉన్నట్లు గుర్తించి కుటుంబ సభ్యులు విస్తుపోయారు. అత్యవసరంగా మరోసారి శస్త్రచికిత్స చేసి వాటిని బయటకు తీయాల్సి వచ్చింది.

వైద్యుల నిర్లక్ష్యం వల్ల బాధితురాలు ప్రాణాపాయ స్థితికి చేరుకుందని, నిర్లక్ష్యంగా వ్యవహరించిన డాక్టర్లు, సంబంధిత వైద్య సిబ్బందిపై కఠిన క్రిమినల్ చర్యలు తీసుకోవాలని బాధిత కుటుంబ సభ్యులు, బంధువులు ఆసుపత్రి ఎదుట బైఠాయించి నిరసన వ్యక్తం చేశారు. ఈ ఘటనపై ఆసుపత్రి ఉన్నతాధికారులు స్పందిస్తూ.. సమగ్ర విచారణకు ఆదేశించామని, బాధ్యులైన వారిపై శాఖాపరమైన కఠిన చర్యలు తీసుకుంటామని హామీ ఇచ్చారు.