కరువు పరిస్థితులపై కేంద్ర బృందం క్షేత్ర స్థాయి పరిశీలన

కంబదూరు: ఖరీఫ్‌-2026 సీజన్‌లో నెలకొన్న కరువు పరిస్థితులు, వర్షాభావం కారణంగా పంటలు ఎదుర్కొంటున్న ఇబ్బందులను క్షేత్రస్థాయిలో పరిశీలించేందుకు కేంద్ర బృందం ఆదివారం కంబదూరు మండలంలోని ములకనూరు గ్రామాన్ని సందర్శించింది. కేంద్ర వ్యవసాయ శాఖ సంయుక్త కార్యదర్శి చిన్మయ్‌ గోట్మారే నేతృత్వంలోని బృందం గ్రామంలో పర్యటించి వ్యవసాయ పరిస్థితులను, రైతులు అనుసరిస్తున్న సాగు పద్ధతులను పరిశీలించింది. ఈ సందర్భంగా రైతు బాబు నాయుడుకు చెందిన 4.50 ఎకరాల విస్తీర్ణంలో ఉన్న వర్షాధార మామిడి తోటను కేంద్ర బృందం క్షుణ్ణంగా పరిశీలించింది. వర్షపాతంపై ఆధారపడి సాగు చేస్తున్న తోటలో నెలకొన్న పరిస్థితులు, నేలలో తేమశాతం, పంటల ఎదుగుదల, కరువు ప్రభావం తదితర అంశాలను అధికారులు అడిగి తెలుసుకున్నారు. తక్కువ వర్షపాతం నమోదైన పరిస్థితుల్లోనూ పంటలను కాపాడుకునేందుకు రైతులు అనుసరిస్తున్న ప్రత్యామ్నాయ వ్యవసాయ విధానాలపై ప్రత్యేకంగా దృష్టి సారించారు. ముఖ్యంగా పెల్లెటైజ్డ్‌ ప్రీ-మాన్‌సూన్‌ డ్రై సోయింగ్‌ (PMDS) విధానంపై కేంద్ర బృందం ఆసక్తి కనబరిచింది. వర్షాకాలం ప్రారంభానికి ముందే ప్రత్యేకంగా రూపొందించిన పెల్లెటైజ్డ్‌ విత్తనాలను భూమిలో విత్తుకోవడం ద్వారా అందుబాటులో ఉన్న నేల తేమను సమర్థంగా వినియోగించుకునే అవకాశం ఉంటుందని అధికారులు వివరించారు. ఈ విధానంతో విత్తనాల మొలకెత్తే సామర్థ్యాన్ని మెరుగుపరచడంతోపాటు వర్షాభావ పరిస్థితుల్లో పంట సాగుకు కొంతమేర భరోసా లభిస్తుందని పేర్కొన్నారు. అలాగే భూమిలో తేమను సంరక్షించే పద్ధతులు, పంటల మధ్య అంతర పంటలను సాగు చేయడం వల్ల రైతులకు అదనపు ఆదాయం సమకూరే అవకాశాలపై వివరించారు. ఒకే పంటపై ఆధారపడకుండా అనువైన అంతర పంటలను సాగులో భాగం చేసుకోవడం ద్వారా వాతావరణ పరిస్థితుల్లో మార్పులు వచ్చినా వ్యవసాయ ఆదాయాన్ని నిలబెట్టుకోవచ్చని సూచించారు. కరువు పరిస్థితులను తట్టుకునేందుకు ప్రకృతి వ్యవసాయ పద్ధతులు ఏ విధంగా దోహదపడుతున్నాయి? వాటిని అనుసరించడం ద్వారా రైతులకు ఎలాంటి ప్రయోజనాలు కలుగుతున్నాయి? అనే అంశాలపై కేంద్ర బృందం రైతులతో చర్చించింది. ఈ సందర్భంగా రైతులు తమ సాగు అనుభవాలను, ఎదుర్కొంటున్న సమస్యలను, ప్రకృతి వ్యవసాయ విధానాల ద్వారా పొందుతున్న ప్రయోజనాలను అధికారులకు వివరించారు. వర్షాభావ పరిస్థితుల్లో పంటల సంరక్షణకు అనుసరిస్తున్న పద్ధతులపై అధికారులు రైతుల నుంచి అభిప్రాయాలు సేకరించారు. క్షేత్రస్థాయి పరిశీలన ద్వారా కరువు తీవ్రత, వ్యవసాయంపై దాని ప్రభావం, రైతుల పరిస్థితులను అంచనా వేయడం ఈ పర్యటన ప్రధాన ఉద్దేశంగా నిలిచింది. ఈ కార్యక్రమంలో జిల్లా కలెక్టర్‌ ఓ.ఆనంద్‌, రాష్ట్ర వ్యవసాయ శాఖ అధికారులు, ప్రకృతి వ్యవసాయ సిబ్బంది, స్థానిక రైతులు పాల్గొన్నారు.
కళ్యాణదుర్గం టౌన్ రిపోర్టర్ :- బోయ రంగస్వామి.