గాయత్రీదేవి అలంకారంలో కనకదుర్గమ్మ దర్శనం

ఇంద్రకీలాద్రి, మేజర్ న్యూస్ : దసరా శరన్నవరాత్రి మహోత్సవాల్లో రెండో రోజైన సోమవారం జగన్మాత శ్రీ కనకదుర్గమ్మవారు వేదమాత శ్రీ గాయత్రీదేవి అలంకారంలో భక్తులకు దర్శనమిస్తున్నారు. వేకువజామున 4 నుంచి 5 గంటల వరకు నూతన పూజా మండపంలో ప్రత్యేక దేవీ ఖడ్గమాలార్చన శాస్త్రోక్తంగా నిర్వహించగా, ఉదయం 6 గంటలకు తొలి విడత విశేష కుంకుమార్చన పూజలు ప్రారంభమయ్యాయి. భక్తులకు ఎలాంటి అసౌకర్యం కలగకుండా ప్రశాంత వాతావరణంలో అమ్మవారి దర్శనం కల్పిస్తున్నారు. విజయవాడ నగరపాలక సంస్థ, దేవస్థానం సమన్వయంతో వినాయక ఆలయం నుంచి క్యూలైన్లలో నిరంతర మంచినీటి సరఫరా, ఉచిత సామగ్రి భద్రపరిచే గది, పాదరక్షల స్టాండ్లను అందుబాటులో ఉంచారు. మహామండపం ప్రాంగణంలో ఉచిత ప్రసాద వితరణ కొనసాగుతుండగా, కనకదుర్గా నగర్‌లో భక్తులకు లడ్డూ ప్రసాదాలు అందించేందుకు విస్తృతంగా కౌంటర్లు ఏర్పాటు చేశారు. ప్రత్యేక పూజల్లో పాల్గొనే భక్తుల కోసం కుమ్మరిపాలెం సెంటర్ నుంచి కొండపైకి ఉచిత వాహనాలు నడుపుతున్నారు. పూజలు, దర్శనం అనంతరం రథం సెంటర్ ఫుట్‌ బ్రిడ్జి అవతల కెనాల్‌ రోడ్డు వద్ద నుంచి తిరిగి కుమ్మరిపాలెం చేరుకునేందుకు వాహనాలు సిద్ధంగా ఉంచారు. సమాచార కేంద్రాలు, మైక్‌ ప్రచారం ద్వారా భక్తులకు ఎప్పటికప్పుడు సేవల వివరాలను తెలియజేస్తున్నారు.