భారీ వర్షాలతో బెంబేలెత్తిన ఓటర్లు..!

-అంబాజీపేట మేజర్ న్యూస్ :స్థానిక సంస్థల ఎన్నికల్లో ఓటింగ్ శాతం దారుణంగా పడిపోవడానికి ప్రధాన కారణం ఇటీవల వచ్చిన తుపాను ప్రభావమేనని తెలుస్తోంది. ఓటర్లలో అనాసక్తి కాదు, పరిస్థితులే వారిని పోలింగ్ కేంద్రాలకు రాకుండా అడ్డుకున్నాయి. తుపాను కారణంగా కురిసిన భారీ వర్షాలతో పలు గ్రామాల్లో రహదారులు జలమయమయ్యాయి. పొలాలు నీట మునిగి రైతులు తీవ్ర ఇబ్బందులు పడ్డారు. ఇళ్లలోకి వరద నీరు చేరడంతో ప్రజలు సహాయక చర్యల్లోనే నిమగ్నమయ్యారు.ఓటు వేయాలన్న ఆసక్తి ఉన్నా, బురద రోడ్లు, తెగిన రాకపోకలు, వర్షపు ముప్పు కారణంగా వృద్ధులు, మహిళలు, దూర ప్రాంతాల ఓటర్లు పోలింగ్ కేంద్రాలకు రాలేకపోయారు. పోల్ మేనేజ్మెంట్ లో లోపం కంటే, ప్రకృతి వైపరీత్యమే ఓటింగ్ ను దెబ్బతీసిందని అనుభవజ్ఞులు చెబుతున్నారు. జిల్లాలో అత్యధికంగా అయినవిల్లి మండలంలో 69.92 శాతం పోలింగ్ నమోదు కాగా, అత్యల్పంగా మలికిపురం లో కేవలం 51.28 శాతం మాత్రమే నమోదైంది. వర్ష ప్రభావం ఎక్కువగా ఉన్న ప్రాంతాల్లోనే పోలింగ్ తక్కువగా నమోదైనట్లు గణాంకాలు స్పష్టం చేస్తున్నాయి.ఒక్క మాటలో చెప్పాలంటే.. ఈ ఎన్నికల్లో ఓటరు ఓడిపోలేదు, తుపాను ముందు ఓటరు నిస్సహాయుడయ్యాడనే మాట ప్రజల నుండి  వినిపిస్తున్నాయి