యూడబ్ల్యూహెచ్ఎంఎస్‌ పోర్టల్ ద్వారానే సరుకుల ఇండెంట్ - అదనపు కలెక్టర్ రాజేశ్వర్

సూర్య ఆదిలాబాద్ ప్రతినిధి  : ప్రభుత్వ వసతి గృహాలు, గురుకుల పాఠశాలలకు అందించే సరుకుల సరఫరాలో పారదర్శకత ఉండేలా అధికారులు సమర్థవంతంగా పనిచేయాలని స్థానిక సంస్థల అదనపు కలెక్టర్  ఎస్.రాజేశ్వర్ స్పష్టం చేశారు. మంగళవారం కలెక్టరేట్ సమావేశ మందిరంలో నాకాఫ్ (NACOF) ద్వారా వివిధ ప్రభుత్వ వసతి గృహాలు, కళాశాలలు, రెసిడెన్షియల్ పాఠశాలలకు సరఫరా చేస్తున్న సరుకుల కోసం కొత్తగా ఏర్పాటు చేసిన 'యూనిఫైడ్ వెల్ఫేర్ హాస్టల్ మేనేజ్‌మెంట్ సిస్టమ్' పోర్టల్ ద్వారా ఇండెంట్  నమోదు, తదితర అంశాలపై అధికారులకు నిర్వహించిన అవగాహన సదస్సులో ఆయన పాల్గొని పలు సూచనలు, సలహాలు అందజేశారు.ఈ సందర్భంగా అదనపు కలెక్టర్ మాట్లాడుతూ, ప్రతి నెలా 5వ తేదీ లోపు సంబంధిత అధికారులందరూ UWHMS పోర్టల్ ద్వారా విధిగా ఇండెంట్ నమోదు చేసుకోవాలని ఆదేశించారు. వసతి గృహాలకు చేరే సరుకుల నాణ్యతను క్షుణ్ణంగా పరిశీలించిన తర్వాతే స్వీకరించాలని, ఒకవేళ నాణ్యత లోపిస్తే ఆ సరుకులను ఎట్టి పరిస్థితుల్లోనూ అంగీకరించకుండా వెంటనే వెనక్కి పంపించాలని తేల్చిచెప్పారు.ఈ సమావేశంలో జిల్లా ఎస్సీ సంక్షేమ అధికారి సునీత, జిల్లా విద్యాశాఖ అధికారి మాధవి, జిల్లా బిసి సంక్షేమ శాఖ అధికారి సోనియా , వివిధ వసతి గృహాల సంక్షేమాధికారులు, కేజీబీవీ స్పెషల్ ఆఫీసర్లు, రెసిడెన్షియల్ పాఠశాలల ప్రిన్సిపాళ్లు, నాకాఫ్ ఇన్‌ఛార్జ్ రమాకాంత్, వంశీకృష్ణ, ఇతర అధికారులు, సిబ్బంది తదితరులు పాల్గొన్నారు.