విద్యుత్ షార్ట్ సర్క్యూట్తో కాలి బూడిదైన 11 ఎకరాల చెరుకు తోట
కోహిర్ ; కోహిర్ మండలం గొట్టిగార్పల్లి గ్రామంలో విద్యుత్ షార్ట్ సర్క్యూట్ కారణంగా భారీ అగ్నిప్రమాదం చోటుచేసుకుంది. ఈ ప్రమాదంలో సుమారు 11 ఎకరాల్లో సాగు చేసిన చెరుకు పంట పూర్తిగా కాలి బూడిదైంది. ఏడాది పొడవునా ఎంతో కష్టపడి, లక్షలాది రూపాయలు పెట్టుబడి పెట్టి సాగు చేసిన పంట చేతికొచ్చే సమయంలో అగ్నికి ఆహుతి కావడంతో రైతులు తీవ్ర ఆవేదనకు గురయ్యారు.ఈ ప్రమాదంలో గ్రామానికి చెందిన రైతులు గొల్ల శివన్న, పండరి, అంజన్న, నారాయణ, మల్లేశ్, అశోక్లకు భారీగా ఆర్థిక నష్టం వాటిల్లింది. అప్పులు చేసి పెట్టుబడులు పెట్టి పంట సాగు చేశామని, తీరా పంట చేతికొచ్చే సమయంలో అగ్నిప్రమాదం కారణంగా పూర్తిగా నష్టపోవాల్సి వచ్చిందని బాధిత రైతులు కన్నీరుమున్నీరవుతున్నారు.ప్రభుత్వం, సంబంధిత అధికారులు తక్షణమే స్పందించి పంట నష్టాన్ని పరిశీలించి, బాధిత రైతులకు తగిన పరిహారం అందించాలని వారు విజ్ఞప్తి చేస్తున్నారు. అప్పుల భారంతో కుంగిపోయిన తమ కుటుంబాలను ప్రభుత్వం ఆదుకోవాలని రైతులు కోరుతున్నారు.