ప్రమాదంలో మృతి చెందిన సారవ్వ కుటుంబానికి అండగా ఉంటాం
సిద్దిపేట అర్బన్, : ముఖ్యమంత్రి రేవంత్ రెడ్డి పర్యటన సందర్భంగా సిద్దిపేటలో నిర్వహించిన బహిరంగ సభ అనంతరం జరిగిన రోడ్డు ప్రమాదంలో హుస్నాబాద్ మండలం నాగారం గ్రామానికి చెందిన కొమ్ము సారవ్వ (55) మృతి చెందడం తీవ్ర విషాదాన్ని నింపిందని సిద్దిపేట నియోజకవర్గ కాంగ్రెస్ పార్టీ ఇన్చార్జి పూజల హరికృష్ణ అన్నారు.సభ ముగిసిన అనంతరం బస్సు కోసం వెళ్తున్న సమయంలో జరిగిన ప్రమాదంలో సారవ్వ ప్రాణాలు కోల్పోవడం బాధాకరమని ఆయన ఆవేదన వ్యక్తం చేశారు. ఈ మేరకు సిద్దిపేట ప్రభుత్వ ఆసుపత్రి మార్చురీలో సారవ్వ పార్థివదేహానికి పూలమాల వేసి నివాళులర్పించారు. అనంతరం మృతురాలి కుటుంబ సభ్యులను పరామర్శించి, ప్రగాఢ సానుభూతి తెలిపారు. ఈ విషాద సమయంలో కుటుంబ సభ్యులకు ధైర్యం చెప్పారు.బాధిత కుటుంబానికి ప్రభుత్వం తరఫున రూ.5 లక్షల ఆర్థిక సహాయం చెక్కును అందజేశారు. అంతేకాకుండా మహిళా సంఘం సభ్యురాలిగా ఉన్న సారవ్వకు వర్తించే రూ.10 లక్షల ప్రమాద బీమా పరిహారం అందేలా అవసరమైన చర్యలు తీసుకుంటామని కుటుంబ సభ్యులకు భరోసా ఇచ్చారు. బాధిత కుటుంబానికి ప్రభుత్వం, కాంగ్రెస్ పార్టీ అండగా ఉంటాయని హామీ ఇచ్చారు.
ఈ కార్యక్రమంలో కాంగ్రెస్ సీనియర్ నాయకులు కాలీముద్దీన్ అహ్మద్తో పాటు పలువురు కాంగ్రెస్ నాయకులు పాల్గొన్నారు.