విధి నిర్వహణలో మృతిచెందిన కానిస్టేబుల్ కుటుంబానికి ₹1 కోటి చెక్కు పంపిణీ -జిల్లా ఎస్పీ డా. సంగ్రామ్ సింగ్ జి పాటిల్
విధి నిర్వహణలో మృతిచెందిన ఆర్మ్‌డ్ రిజర్వు కానిస్టేబుల్ రాజు కుటుంబానికి స్టేట్ బ్యాంక్ ఆఫ్ ఇండియా అందించిన రూ. 1 కోటి విలువైన పోలీస్ శాలరీ ప్యాకేజ్ ఇన్సూరెన్స్ చెక్కును జిల్లా ఎస్పీ డా. సంగ్రామ్ సింగ్ జి పాటిల్ శుక్రవారం జిల్లా పోలీస్ కార్యాలయంలో బాధిత కుటుంబ సభ్యులకు అందజేశారు. గత ఆగస్టు నెలలో కొల్లాపూర్ సీఎం బందోబస్తు విధులు ముగించుకొని తిరిగి నాగర్ కర్నూల్ వస్తున్న క్రమంలో ఏఆర్ కానిస్టేబుల్ రాజు పిడుగుపాటుకు గురై అక్కడికక్కడే మృతి చెందారు. ఆయనకు స్టేట్ బ్యాంక్ ఆఫ్ ఇండియాలో పోలీస్ శాలరీ ప్యాకేజ్ ఖాతా ఉన్నందున, సంబంధిత బీమా నిబంధనల ప్రకారం బ్యాంకు యాజమాన్యం రూ. 1 కోటి పరిహారాన్ని మంజూరు చేసింది. ఈ సందర్భంగా జిల్లా ఎస్పీ మాట్లాడుతూ బాధిత కుటుంబానికి కానిస్టేబుల్ రాజు లేని లోటు తీర్చలేనిధని ఇటువంటి క్లిష్ట సమయంలో రాజు కుటుంబానికి పోలీస్ శాఖ ఎల్లప్పుడూ అండగా ఉంటుందని అన్నారు. క్లిష్ట సమయంలో ఎస్‌బీఐ పోలీస్ శాలరీ ప్యాకేజ్ ద్వారా లభించిన పరిహారం వారి కుటుంబానికి ఆర్థికంగా కొంత ఆసరాగా నిలుస్తుందని,ప్రతి ఒక్క సిబ్బంది పోలీస్ శాలరీ ప్యాకేజ్ చేసుకోవాలని అదేవిధంగా హెల్త్ ఇన్సూరెన్స్ తీసుకోవాలని తెలిపారు. కార్యక్రమంలో జిల్లా పోలీస్ కార్యాలయ ఏవో కృష్ణయ్య, ఆర్ఐ రాఘవరావు, ఆర్ఎస్ఐ గౌస్ పాషా, జిల్లా పోలీస్ కోఆర్డినేటర్ శ్రీనివాస్, స్టేట్ బ్యాంక్ ఆఫ్ ఇండియా ప్రతినిధులు పాల్గొన్నారు.
-పి.వినయ్ కుమార్, నాగర్ కర్నూల్ క్రైమ్, సూర్య న్యూస్
