వేగవంతంగా ఇందిరమ్మ ఇళ్ల నిర్మాణం పూర్తి చేయాలి

సూర్య,భీమ్‌గల్ : భీమ్‌గల్ మండలం మెండోరా గ్రామంలో నూతనంగా మంజూరైన ఐదు ఇందిరమ్మ ఇళ్లకు ఎంపీడీఓ గంగుల సంతోష్ కుమార్ గురువారం భూమిపూజ నిర్వహించారు. అనంతరం లబ్ధిదారులకు మంజూరు పత్రాలను అందజేశారు.ఈ సందర్భంగా ఆయన మాట్లాడుతూ.. మొదటి విడతలో గ్రామానికి మంజూరైన 43 ఇందిరమ్మ ఇళ్ల నిర్మాణాలను పూర్తి చేయడం పట్ల గ్రామ ప్రజాప్రతినిధులను అభినందించారు. పేదలకు ఇందిరమ్మ ఇల్లు ఒక వరమని, సొంతింటి కలను సాకారం చేసుకునేందుకు ప్రభుత్వం ఈ పథకాన్ని అమలు చేస్తోందని తెలిపారు. నూతనంగా ఇళ్లు మంజూరైన లబ్ధిదారులు వెంటనే నిర్మాణ పనులు ప్రారంభించి, త్వరితగతిన పూర్తి చేసుకునేలా చర్యలు తీసుకోవాలని సూచించారు.ఈ కార్యక్రమంలో గ్రామ ఉపసర్పంచ్ రమేష్, వార్డు సభ్యులు, ఇందిరమ్మ కమిటీ సభ్యులు, ప్రజాప్రతినిధులు, లబ్ధిదారులు పాల్గొన్నారు.