రాష్ట్రస్థాయి క్రికెట్ పోటీలకు హేమశ్రీ ఎంపిక

భోగాపురం, సూర్య : స్కూల్ గేమ్స్ ఫెడరేషన్ ఆధ్వర్యంలో నిర్వహించే అండర్‌-17 రాష్ట్రస్థాయి క్రికెట్ పోటీలకు భోగాపురం మండలం జగ్గయ్యపేట గ్రామానికి చెందిన కొల్లి హేమశ్రీ ఎంపికైంది. శ్రీ సాయి నారాయణ హైస్కూల్‌లో విద్యనభ్యసిస్తున్న హేమశ్రీ జిల్లా జట్టు తరఫున రాష్ట్రస్థాయి పోటీల్లో ప్రాతినిధ్యం వహించనుంది. జిల్లా నుంచి ఎంపికైన 15 మంది సభ్యుల జట్టులో ఆమెకు చోటు దక్కడం విశేషం. ఈ నెల 8వ తేదీ నుంచి కృష్ణా జిల్లాలో రాష్ట్రస్థాయి పోటీలు జరగనున్నాయి. చదువుతోపాటు క్రీడల్లోనూ ప్రతిభ కనబరుస్తూ రాష్ట్రస్థాయి పోటీలకు ఎంపిక కావడం పట్ల హేమశ్రీని పాఠశాల యాజమాన్యం అభినందించింది. క్రీడల పట్ల ఆసక్తి, నిరంతర సాధన, క్రమశిక్షణతో ఈ స్థాయికి చేరుకోవడం అభినందనీయమని పేర్కొంది. విద్యార్థినిలోని క్రీడా నైపుణ్యాన్ని గుర్తించి, తగిన శిక్షణ అందించిన పాఠశాల పీఈటీ శివప్రసాద్‌ను ప్రత్యేకంగా ప్రశంసించింది. ఈ సందర్భంగా పాఠశాల డైరెక్టర్ పి. సుధీర్, ప్రిన్సిపాల్ పి. అరుణ మాట్లాడుతూ.. హేమశ్రీ రాష్ట్రస్థాయి పోటీల్లో ఉత్తమ ప్రతిభ కనబరిచి పాఠశాలకు, గ్రామానికి, జిల్లాకు మంచి పేరు తీసుకురావాలని ఆకాంక్షించారు. విద్యార్థుల ప్రతిభను ప్రోత్సహిస్తూ క్రీడల్లో రాణించేలా తీర్చిదిద్దడమే పాఠశాల లక్ష్యమని తెలిపారు. హేమశ్రీ మరిన్ని విజయాలు సాధించాలని వారు ఆకాంక్షించారు.