వైద్యుల నిర్లక్ష్యంతో వ్యక్తి మృతి.. ఆస్పత్రి ఎదుట బంధువుల ఆందోళన
రాజేంద్రనగర్ , మేజర్ న్యూస్: గొంతునొప్పితో చికిత్స కోసం ఆస్పత్రిలో చేరిన జామ జగన్ అనే వ్యక్తి మృతి చెందడం మైలార్దేవ్పల్లి పోలీస్స్టేషన్ పరిధిలో కలకలం రేపింది. జల్పల్లి గ్రామానికి చెందిన జగన్ గురువారం ఉదయం 6 గంటలకు పోలీస్స్టేషన్ ఎదురుగా ఉన్న టీఆర్జీ శ్రీనివాస్ ఆస్పత్రిలో చేరాడు. అయితే వైద్యులు సరైన పరీక్షలు, చికిత్స అందించకపోవడం వల్లే ఆయన మృతి చెందాడని కుటుంబ సభ్యులు ఆరోపించారు.
వైద్యుల నిర్లక్ష్యమే మృతికి కారణమంటూ మృతుడి కుటుంబ సభ్యులు, బంధువులు ఆస్పత్రి ఎదుట ఆందోళన చేపట్టారు. బాధ్యులైన వైద్యులపై చర్యలు తీసుకోవాలని, మృతుడి కుటుంబానికి న్యాయం చేయాలని డిమాండ్ చేశారు. ఘటనపై వైద్య ఆరోగ్యశాఖ అధికారులు విచారణ జరిపి తగిన చర్యలు తీసుకోవాలని కోరారు. సమాచారం అందుకున్న మైలార్దేవ్పల్లి పోలీసులు కేసు నమోదు చేసి దర్యాప్తు చేపట్టారు.
అంకం జగన్, మేజర్ న్యూస్, రాజేంద్రనగర్