telangana
తెలంగాణ టెట్ నోటిఫికేషన్ విడుదల..
హైదరాబాద్: తెలంగాణ రాష్ట్రంలో ఉపాధ్యాయ అర్హత పరీక్ష (TGTET-January-2027) నిర్వహణకు పాఠశాల విద్యాశాఖ నోటిఫికేషన్ విడుదల చేసింది. ఈ పరీక్షలను పూర్తిగా ఆన్‌లైన్ విధానంలో (కంప్యూటర్ బేస్డ్ టెస్ట్ - CBT) నిర్వహించనున్నట్లు అధికారులు ప్రకటించారు. అర్హులైన అభ్యర్థులు నవంబర్ 16వ తేదీ నుంచి డిసెంబర్ 10వ తేదీ వరకు ఆన్‌లైన్ ద్వారా తమ దరఖాస్తులను సమర్పించవచ్చని తెలిపారు.
షెడ్యూల్ ప్రకారం 2027 జనవరి 3వ తేదీ నుంచి 15వ తేదీ వరకు ప్రతిరోజూ రెండు సెషన్లలో టెట్ పరీక్షలను నిర్వహించనున్నారు. పరీక్షల ప్రక్రియ ముగిసిన అనంతరం ఫిబ్రవరి రెండో వారంలో ఫలితాలను విడుదల చేయనున్నట్లు విద్యాశాఖ స్పష్టం చేసింది. దరఖాస్తు రుసుము విషయానికి వస్తే.. జనరల్ మరియు బీసీ కేటగిరీ అభ్యర్థులకు ఏదైనా ఒక పేపర్ రాసేందుకు రూ. 750, రెండు పేపర్లు (పేపర్-1 మరియు పేపర్-2) రాసేందుకు రూ. 1,000 ఫీజుగా నిర్ణయించారు. కాగా, ఎస్సీ, ఎస్టీ మరియు దివ్యాంగ అభ్యర్థులకు పరీక్ష ఫీజులో ప్రత్యేక రాయితీ వర్తిస్తుందని పాఠశాల విద్యాశాఖ తన ప్రకటనలో పేర్కొంది.
