తాళ్లపేటలో దాడి.. ముగ్గురికి గాయాలు
మంచిర్యాల జిల్లా, సూర్య ప్రతినిధి : దండేపల్లి మండలం తాళ్లపేట గ్రామంలో జరిగిన దాడి ఘటనలో ఆరుగురు వ్యక్తులపై పోలీసులు కేసు నమోదు చేశారు. ఈ ఘటనలో ముగ్గురికి గాయాలయ్యాయి.
పోలీసుల వివరాల ప్రకారం.. ఈ నెల 20న సాయంత్రం 5.40 గంటల సమయంలో పేరం రజిత తన సోదరుడు ఆకుల రాజేంద్ర ప్రసాద్, మేనల్లుడు ఆకుల అకిరానందన్‌తో కలిసి జమ్మికి వెళ్తున్న సమయంలో పొరుగువారైన ఆకుల కిరణ్‌, ఆకుల రాజేందర్‌, ఆకుల సురేష్‌, ఆకుల విజయ్‌ వర్ధన్‌, ముట్టె కుమారస్వామి, ఎర్రం మల్లేష్‌ తమ ఇంట్లోకి అక్రమంగా ప్రవేశించి అసభ్య పదజాలంతో దూషిస్తూ కర్రలు, చేతులతో దాడి చేసినట్లు ఫిర్యాదులో పేర్కొన్నారు.
ఈ దాడిలో రాజేంద్ర ప్రసాద్, అకిరానందన్‌ల తలలకు, రజిత చేతికి గాయాలయ్యాయి. బాధితులను తీవ్ర పరిణామాలు ఎదుర్కోవాల్సి వస్తుందని నిందితులు బెదిరించినట్లు ఫిర్యాదులో తెలిపారు.
ఈ ఘటనపై కేసు నమోదు చేసిన దండేపల్లి పోలీసులు ఆకుల కిరణ్‌, ఆకుల సురేష్‌, ఆకుల విజయ్‌ వర్ధన్‌లను అరెస్ట్‌ చేశారు. మిగిలిన ముగ్గురు నిందితుల కోసం దర్యాప్తు కొనసాగిస్తున్నారు.
