ప్రశాంత వాతావరణంలో నామినేషన్ల ప్రక్రియ. అద్దంకిలో ఎంపీటీసీ ఎన్నికల నామినేషన్ల ప్రక్రియను పరిశీలించిన కలెక్టర్.

సూర్య న్యూస్ అద్దంకి.

ప్రకాశం జిల్లా వ్యాప్తంగా ఎంపీటీసీ, జడ్పిటిసి ఎన్నికల నామినేషన్ల ప్రక్రియ ప్రశాంత వాతావరణంలో శాంతియుతంగా జరుగుతున్నాయని ప్రకాశం జిల్లా కలెక్టర్ రాజాబాబు అన్నారు. అద్దంకి ఎంపీడీవో కార్యాలయంలో జరుగుతున్న నామినేషన్ల ప్రక్రియను ఆయన స్వయంగా పరిశీలించారు. అనంతరం ఆయన మీడియాతో మాట్లాడుతూ జిల్లాలోని 27 మండలాల పరిధిలో గల 27 జెడ్పిటిసి స్థానాలకు సంబంధించి జిల్లా పరిషత్ కార్యాలయంలో నామినేషన్లు స్వీకరిస్తున్నట్లు కలెక్టర్ తెలిపారు. అలాగే ఎంపిటిసి స్థానాలకు ఆయా మండల పరిషత్ కార్యాలయాల్లో నామినేషన్ల స్వీకరణ ప్రక్రియ సజావుగా సాగుతోందని పేర్కొన్నారు. ఎన్నికల నిర్వహణలో భాగంగా జిల్లాలోని సమస్యాత్మక ప్రాంతాలైన దర్శి, ముండ్లమూరు, తాళ్లూరు తదితర మండలాల్లో స్వయంగా పర్యటించి పరిశీలించినట్లు కలెక్టర్ చెప్పారు. అక్కడ కూడా నామినేషన్ల ప్రక్రియ ఎలాంటి విఘాతం లేకుండా, ప్రశాంతంగా సాగుతోందని స్పష్టం చేశారు. శాంతిభద్రతల పరిరక్షణ విషయంలో ఎక్కడా రాజీ పడకూడదని, ఎలాంటి అవాంఛనీయ సంఘటనలు లేదా శాంతిభద్రతల సమస్యలు తలెత్తకుండా తగిన చర్యలు తీసుకోవాలని పోలీసు అధికారులను ఇప్పటికే ఆదేశించినట్లు ఆయన పేర్కొన్నారు. అన్ని రాజకీయ పార్టీల ప్రతినిధులతో నిర్వహించిన సమావేశంలో స్పష్టమైన సూచనలు చేసినట్లు కలెక్టర్ తెలిపారు. నామినేషన్ వేసే అభ్యర్థులు ప్రశాంతంగా వచ్చి తమ నామినేషన్లు సమర్పించుకోవాలని సూచించారు.