రొంపిచర్లలో ఉద్రిక్తత.. పోలీసుల లాఠీచార్జి

నరసరావుపేట మేజర్ న్యూస్ :

నరసరావుపేట రొంపిచర్ల మండల కేంద్రంలో తీవ్ర ఉద్రిక్త పరిస్థితులు నెలకొన్నాయి. ఎంపీటీసీ నామినేషన్ దాఖలు చేసేందుకు తన అనుచరులతో బయలుదేరిన మాజీ ఎమ్మెల్యే గోపిరెడ్డి శ్రీనివాసరెడ్డిని నామినేషన్ కేంద్రం వద్దకు వెళ్లకుండా పోలీసులు అడ్డుకున్నారు. దీంతో ఒక్కసారిగా ఉద్రిక్త వాతావరణం ఏర్పడింది. మరోవైపు ఎంపీడీఓ కార్యాలయం సమీపంలోని రహదారిపై పెద్దఎత్తున టీడీపీ శ్రేణులు మోహరించడంతో పరిస్థితి మరింత ఉద్రిక్తంగా మారింది. పరిస్థితిని అదుపులోకి తీసుకొచ్చేందుకు పోలీసులు లాఠీచార్జి చేశారు. టీడీపీ, వైసీపీ వర్గీయులను ఎక్కడికక్కడ చెదరగొట్టే ప్రయత్నం చేస్తున్నారు. ఉద్రిక్త పరిస్థితుల నేపథ్యంలో నరసరావుపేట నుంచి రొంపిచర్లకు అదనపు పోలీసు బలగాలు బయలుదేరాయి. రొంపిచర్ల మండల కేంద్రంలో నెలకొన్న పరిణామాలతో తీవ్ర ఉద్రిక్త వాతావరణం కొనసాగుతోంది. పోలీసులు మాజీ ఎమ్మెల్యే గోపిరెడ్డిని అదుపులోకి తీసుకున్నారు.

రిపోర్టర్ మల్లికార్జునరావు, పల్నాడు జిల్లా ఇంచార్జి.