వెల్దుర్తి ఎంపీడీఓ కార్యాలయాన్ని పరిశీలించిన జిల్లా ఎస్పీ విక్రాంత్ పాటిల్

వెల్దుర్తి, సూర్య ప్రతినిధి మేజర్ న్యూస్:కర్నూలు జిల్లా ఎస్పీ విక్రాంత్ పాటిల్ వెల్దుర్తి మండల పరిషత్ అభివృద్ధి అధికారి (ఎంపీడీఓ) కార్యాలయాన్ని సందర్శించి, పరిశీలించారు.  ఈ సందర్భంగా ఎస్పీ విక్రాంత్ పాటిల్ మాట్లాడుతూ... కర్నూలు జిల్లాలోని 26 మండలాల్లో ఎంపీటీసీ ఎలక్షన్ నామినేషన్ ప్రక్రియ ఉదయం 10:30 గంటలకు ప్రారంభమైందని తెలిపారు. 26 మండల ఎంపీడీఓ ఆఫీసులతో పాటు కర్నూలు జిల్లా పరిషత్ (జెడ్పీ) ఆఫీసులో జెడ్పీటీసీ నామినేషన్ల స్వీకరణ జరుగుతోందని పేర్కొన్నారు.  మొత్తం 27 కేంద్రాల్లో ఎటువంటి అవాంఛనీయ సంఘటనలు జరగకుండా గట్టి పోలీస్ బందోబస్తు ఏర్పాటు చేశామని తెలిపారు. నామినేషన్ కేంద్రాల వద్ద 100 మీటర్లు, 500 మీటర్ల వద్ద కటాఫ్ పరిమితులు విధించామని వివరించారు. సమస్యాత్మక ప్రాంతాల్లో అదనపు పోలీస్ బలగాలను మోహరించి, నామినేషన్ ప్రక్రియ ప్రశాంతంగా, నిబంధనలకు అనుగుణంగా జరిగేలా చర్యలు తీసుకుంటున్నట్లు ఎస్పీ స్పష్టం చేశారు.  ఈ కార్యక్రమంలో వెల్దుర్తి సర్కిల్ ఇన్ స్పెక్టర్ (సీఐ) యుగంధర్, స్థానిక సబ్ ఇన్ స్పెక్టర్ (ఎస్ఐ) నరేష్ మరియు ఇతర పోలీస్ సిబ్బంది పాల్గొన్నారు సూర్య ప్రతినిధి షేక్ దస్తు కర్నూలు జిల్లా వెల్దుర్తి మండలం