సైబర్ నేరాలపై అప్రమత్తంగా ఉండాలి.. అనుమానాస్పద లింక్‌లను క్లిక్ చేయొద్దు: డీఎస్పీ కాజల్ జైస్వాల్
వికారాబాద్ జిల్లా ప్రతినిధి,మేజర్ న్యూస్: సైబర్ నేరాల పట్ల ప్రతి ఒక్కరూ అప్రమత్తంగా ఉండాలని, ఆన్‌లైన్ లావాదేవీలు నిర్వహించే సమయంలో తగిన జాగ్రత్తలు పాటించాలని సైబర్ క్రైమ్ డీఎస్పీ కాజల్ జైస్వాల్ సూచించారు. జాతీయ సైబర్ భద్రత అవగాహన మాసం–2026 సందర్భంగా వికారాబాద్ పట్టణంలో సైబర్ నేరాల నివారణపై ప్రజలకు అవగాహన కల్పించేందుకు ఫ్లాష్ మార్చ్ నిర్వహించారు.జిల్లా ఎస్పీ శ్రీమతి స్నేహ మెహ్రా ఆదేశాల మేరకు జిల్లా డీ4సీ విభాగం ఆధ్వర్యంలో అక్టోబర్ నెల పొడవునా “PAUSE FOR SAFETY – PAUSE. THINK. VERIFY.” అనే నినాదంతో వివిధ అవగాహన కార్యక్రమాలు చేపట్టారు. ఇందులో భాగంగా సైబర్ నేరాలు, ఆన్‌లైన్ ఆర్థిక మోసాలు, డిజిటల్ లావాదేవీల సమయంలో తీసుకోవాల్సిన జాగ్రత్తలపై ప్రజలకు అవగాహన కల్పించారు.ఈ కార్యక్రమాల ముగింపులో సైబర్ క్రైమ్ డీఎస్పీ కాజల్ జైస్వాల్ సమక్షంలో వికారాబాద్ పట్టణ పోలీసుల ఆధ్వర్యంలో చిగుళ్లపల్లి గ్రౌండ్ నుంచి బసవేశ్వర చౌరస్తా మీదుగా ఎన్టీఆర్ చౌరస్తా వరకు సైబర్ అవగాహన ఫ్లాష్ మార్చ్ నిర్వహించారు. ఈ సందర్భంగా సైబర్ నేరాల పట్ల ప్రజలు అప్రమత్తంగా ఉండాలని, గుర్తుతెలియని వ్యక్తులు పంపే అనుమానాస్పద లింక్‌లను క్లిక్ చేయవద్దని, బ్యాంకు ఖాతా వివరాలు, ఓటీపీ, వ్యక్తిగత సమాచారాన్ని ఇతరులతో పంచుకోవద్దని అవగాహన కల్పించారు. ఏదైనా ఆన్‌లైన్ లావాదేవీ చేసే ముందు ఒకటికి రెండుసార్లు పరిశీలించి, సమాచారాన్ని ధృవీకరించుకున్న తర్వాతే ముందుకు వెళ్లాలని సూచించారు.సైబర్ నేరగాళ్ల మోసాలకు బలికాకుండా ప్రతి ఒక్కరూ సురక్షితమైన డిజిటల్ అలవాట్లను పాటించాలని, అనుమానాస్పద కాల్స్, మెసేజ్‌లు, లింక్‌ల విషయంలో అప్రమత్తంగా ఉండాలని ఈ ఫ్లాష్ మార్చ్ ద్వారా సందేశాన్ని అందించారు. ఈ కార్యక్రమంలో వికారాబాద్ టౌన్ ఇన్‌స్పెక్టర్ రఘు కుమార్, సైబర్ క్రైమ్ పోలీసు సిబ్బంది, యువతీయువకులు, విద్యార్థులు తదితరులు పాల్గొన్నారు.
