రొమ్ము క్యాన్సర్‌ చికిత్సకు సమగ్ర వైద్య సేవలు నిర్ధారణ నుంచి పునరావాసం వరకు ఒకే వేదికపై.. కిమ్స్‌ రెనోవాలో ప్రత్యేక కార్యక్రమం
హైదరాబాద్‌, మేజర్ న్యూస్ ప్రతినిధి : రొమ్ము క్యాన్సర్‌ నిర్ధారణ, చికిత్స, పునరావాస సేవలను ఒకే వేదికపై అందించే లక్ష్యంతో కొండాపూర్‌లోని కిమ్స్‌ రెనోవా క్యాన్సర్‌ ఇన్‌స్టిట్యూట్‌ ప్రత్యేక కార్యక్రమాన్ని ప్రారంభించింది. పింక్‌ అక్టోబర్‌లో భాగంగా అందుబాటులోకి తెచ్చిన ఈ కార్యక్రమాన్ని బి-రెడీ, బి-అహెడ్‌, బి-యు అనే మూడు విభాగాలుగా రూపొందించారు. బి-రెడీ ద్వారా అధునాతన పరీక్షలతో క్యాన్సర్‌ను గుర్తించడం, బి-అహెడ్‌ ద్వారా శస్త్రచికిత్స, కీమోథెరపీ, రేడియోథెరపీ వంటి చికిత్సలను నిపుణుల సమన్వయంతో అందించడం, బి-యు ద్వారా చికిత్స అనంతరం పునరావాస సేవలు కల్పించడం ప్రధాన లక్ష్యాలు. ప్రత్యేకంగా ఏర్పాటు చేసిన ‘పింక్‌ రూమ్‌’లో ఫిజియోథెరపీ, పోషకాహార సలహాలు, మానసిక ఆరోగ్య సహాయం, యోగా సేవలు అందించనున్నారు.
కిమ్స్‌ హాస్పిటల్స్‌ ఛైర్మన్‌, మేనేజింగ్‌ డైరెక్టర్‌ డాక్టర్‌ భాస్కర్‌ రావు బొల్లినేని మాట్లాడుతూ, రొమ్ములో గడ్డలు లేదా అసాధారణ మార్పులు కనిపిస్తే వెంటనే వైద్యులను సంప్రదించాలని సూచించారు. ఆంకాలజీ సేవల డైరెక్టర్‌ డాక్టర్‌ సతీష్‌ పవార్‌ మాట్లాడుతూ, చికిత్సతో పాటు రోగులు శారీరకంగా, మానసికంగా కోలుకునేందుకు పునరావాస సేవలు కీలకమని తెలిపారు. నిర్ధారణ నుంచి కోలుకునే వరకు సమగ్ర సంరక్షణ అందించడమే ఈ కార్యక్రమ లక్ష్యమని సంస్థ వెల్లడించింది.
