రైతులకు అండగా సీసీఐ కొనుగోలు కేంద్రం.. భూ సమస్యల పరిష్కారానికి భూ భారతి

చింతపల్లి (నల్లగొండ జిల్లా), మేజర్ న్యూస్:రైతుల సంక్షేమం, భూ సమస్యల పరిష్కారం, పేదలకు సొంతింటి కల సాకారం, చిన్నారులకు విద్యాబాట చూపడమే లక్ష్యంగా వివిధ కార్యక్రమాల్లో దేవరకొండ ఎమ్మెల్యే నేనావత్ బాలు నాయక్ పాల్గొన్నారు. చింతపల్లి మండల కేంద్రంలోని శ్రీ శివ సాయి కాటన్ జిన్నింగ్ మిల్లులో కాటన్ కార్పొరేషన్ ఆఫ్ ఇండియా (సీసీఐ) ఆధ్వర్యంలో ఏర్పాటు చేసిన పత్తి కొనుగోలు కేంద్రాన్ని ఎమ్మెల్యే ప్రారంభించారు. ఈ సందర్భంగా ఆయన మాట్లాడుతూ, రైతులు దళారులపై ఆధారపడకుండా ప్రభుత్వ కొనుగోలు కేంద్రాలను సద్వినియోగం చేసుకోవాలని సూచించారు. పత్తిని శుభ్రంగా, తేమ శాతం తగ్గించి తీసుకురావాలని, నాణ్యతా ప్రమాణాలకు అనుగుణంగా విక్రయించి కనీస మద్దతు ధర పొందాలని పేర్కొన్నారు. కొనుగోలు కేంద్రంలో ప్రదర్శించిన ధరల పట్టిక ప్రకారం, పత్తి రకాన్ని బట్టి క్వింటాలుకు రూ.8,567 నుంచి రూ.8,667 వరకు ధరలు ఉన్నాయని, తుది ధర పత్తి నాణ్యత, తేమ శాతం, వర్తించే నిబంధనల ఆధారంగా నిర్ణయించబడుతుందని తెలిపారు.

అనంతరం చింతపల్లి మండలం ఉప్పరపల్లి గ్రామంలో భూముల రీ సర్వేపై నిర్వహించిన అవగాహన గ్రామసభలో ఎమ్మెల్యే పాల్గొన్నారు. దశాబ్దాలుగా ఉన్న భూ రికార్డుల వ్యత్యాసాలు, సరిహద్దు వివాదాల పరిష్కారానికి రికార్డుల పరిశీలన, సర్వే ఎంతో కీలకమని పేర్కొన్నారు. ముఖ్యమంత్రి రేవంత్ రెడ్డి నేతృత్వంలోని ప్రజా ప్రభుత్వం, రెవెన్యూ మంత్రి పొంగులేటి శ్రీనివాస్ రెడ్డి ఆధ్వర్యంలో అమలవుతున్న భూ భారతి చట్టం ద్వారా భూ రికార్డుల నిర్వహణలో పారదర్శకతకు చర్యలు తీసుకుంటున్నట్లు తెలిపారు. అర్హత, నిబంధనల మేరకు భూములకు సంబంధించిన వివరాలను పరిశీలించి LPM (ల్యాండ్ పార్సెల్ మ్యాప్) నంబర్ల కేటాయింపు ప్రక్రియ చేపడతారని వివరించిన ఆయన, రైతులు తమ భూములకు సంబంధించిన పత్రాలను సిద్ధంగా ఉంచుకొని సర్వే అధికారులకు సహకరించాలని సూచించారు.

అదేవిధంగా, ఉప్పరపల్లి గ్రామంలో ఇందిరమ్మ ఇళ్ల లబ్ధిదారుల గృహప్రవేశ కార్యక్రమాల్లో ఎమ్మెల్యే పాల్గొని కుటుంబ సభ్యులకు శుభాకాంక్షలు తెలిపారు. సొంత ఇల్లు పేద కుటుంబాలకు భద్రత, ఆత్మగౌరవాన్ని అందిస్తుందని, అర్హులైన లబ్ధిదారులు ప్రభుత్వ పథకాలను సద్వినియోగం చేసుకోవాలని పేర్కొన్నారు. అనంతరం గ్రామంలోని అంగన్‌వాడీ కేంద్రంలో చిన్నారికి ఎమ్మెల్యే బాలు నాయక్ అక్షరాభ్యాసం చేయించారు. బాల్యంలోనే విద్యపై ఆసక్తి పెంపొందించడం ద్వారా పిల్లల భవిష్యత్తుకు పునాది వేయవచ్చని, చిన్నారులకు పౌష్టికాహారం, ప్రాథమిక విద్య, మెరుగైన సంరక్షణ అందించడంలో అంగన్‌వాడీ కేంద్రాల పాత్ర కీలకమని కొనియాడారు.

ఈ కార్యక్రమాల్లో సంబంధిత అధికారులతో పాటు దొంతం సంజీవరెడ్డి, జాటావత్ హరినాయక్, కొండూరు పవన్ కుమార్, ఎరుకల వెంకటయ్య గౌడ్, ముచ్చర్ల గిరి, అంగిరేకుల నాగభూషణం, జంగిటి నర్సింహా యాదవ్, చింతలపూడి భాస్కర్ రెడ్డి, కాసారపు శ్రీను, మెండె వెంకట్ యాదవ్, కాయితి రామకృష్ణ రెడ్డి, వాంకుడోత్ రవి నాయక్, కాయితి జితేందర్ రెడ్డి, దాసరి శ్రీనివాస్ యాదవ్, యాచారం యాదిగౌడ్, అంగిరేకుల గోవర్ధన్, గుణమోని కొండల్ యాదవ్, ప్రజా ప్రతినిధులు, కాంగ్రెస్ పార్టీ ముఖ్య నాయకులు, యువజన కాంగ్రెస్ నాయకులు, రైతులు, గ్రామస్తులు తదితరులు పాల్గొన్నారు.