ప్రేమ్‌నగర్‌లో ఉచిత వైద్య శిబిరం
ఖైరతాబాద్ మేజర్ న్యూస్: పేద, మధ్యతరగతి ప్రజలకు వైద్య సేవలను చేరువ చేయాలనే లక్ష్యంతో అపోలో ఆసుపత్రి, జై జవాన్‌ జై కిసాన్‌ యువజన సంక్షేమ సంఘం, ప్రేమ్‌నగర్‌ బస్తీ కమిటీ సంయుక్తంగా ప్రేమ్‌నగర్‌లోని అంబేద్కర్‌ భవన్‌లో ఉచిత వైద్య శిబిరాన్ని నిర్వహించాయి. ఈ శిబిరానికి స్థానికుల నుంచి మంచి స్పందన లభించింది. వివిధ ఆరోగ్య సమస్యలతో వచ్చిన వారికి వైద్య పరీక్షలు నిర్వహించి తగిన సూచనలు అందించారు. శిబిరంలో కీళ్ల నొప్పులు, కీళ్లవాతం, ఇతర ఆర్థోపెడిక్‌ సమస్యలకు సంబంధించి వైద్య సేవలు అందించారు. ప్రతి ఒక్కరికీ షుగర్‌, బీపీ పరీక్షలు నిర్వహించి ఆరోగ్య పరిస్థితిపై అవగాహన కల్పించారు. అనారోగ్య సమస్యలను తొలిదశలోనే గుర్తించి చికిత్స తీసుకోవాలని వైద్యులు సూచించారు.
చిన్నారుల ఆరోగ్యంపై ప్రత్యేక శ్రద్ధ పిల్లల పోషకాహారం, ఆహారపు అలవాట్లు, శారీరక ఎదుగుదల, మానసిక ఆరోగ్యంపై తల్లిదండ్రులకు అవగాహన కల్పించారు. చిన్నతనం నుంచే ఆరోగ్యకరమైన అలవాట్లు నేర్పించడం ద్వారా పిల్లల సంపూర్ణ ఎదుగుదలకు తోడ్పడవచ్చని వివరించారు. వైద్య శిబిరం కోఆర్డినేటర్‌ నితిన్‌ సింగ్‌ మాట్లాడుతూ ఆర్థిక ఇబ్బందుల కారణంగా ఎవరూ వైద్యానికి దూరం కాకూడదన్నదే తమ లక్ష్యమన్నారు. ఆరోగ్యశ్రీతో పాటు అర్హత కలిగిన ఇతర ఆరోగ్య కార్డుల ద్వారా నిబంధనలకు అనుగుణంగా ఉచిత వైద్య సేవలు, అవసరమైన శస్త్రచికిత్సలు అందించేందుకు అపోలో ఆసుపత్రి కృషి చేస్తుందని తెలిపారు. త్వరలో మెగా హెల్త్‌ క్యాంప్‌
ప్రేమ్‌నగర్‌ పంచాయతీ కమిటీ మాజీ చైర్మన్‌ టీ. వెంకటేశం మాట్లాడుతూ అపోలో ఆసుపత్రి సహకారంతో త్వరలో మెగా వైద్య శిబిరాన్ని నిర్వహించేందుకు ప్రణాళిక రూపొందిస్తున్నట్లు వెల్లడించారు. ఈ శిబిరంలో ఈసీజీ, 2డీ ఎకోతో పాటు వివిధ వైద్య పరీక్షలను ఉచితంగా అందించేలా ఏర్పాట్లు చేయాలని భావిస్తున్నట్లు తెలిపారు. ఈ కార్యక్రమంలో యువజన సంఘం ప్రధాన కార్యదర్శి, జాతీయ యువజన అవార్డు గ్రహీత కె. భగవాన్‌ దాస్‌, కే.ఆర్‌. నర్సింగ్‌ రావు, బి. శ్రవణ్‌ కుమార్‌, జి. హర్షవర్ధన్‌, బి. మల్లేష్‌, ఆర్‌. సురేష్‌ కుమార్‌, మామిడి నర్సింగరావు తదితరులు పాల్గొన్నారు. శిబిరం విజయవంతానికి సహకరించిన వైద్య సిబ్బంది, యువజన సంఘం సభ్యులు, బస్తీ కమిటీ ప్రతినిధులకు నిర్వాహకులు కృతజ్ఞతలు తెలిపారు.
